100 நாள் வேலை ஆட்களை வைத்து நடக்கும் கிராம சபைக் கூட்டம்: ஆட்சியரிடம் மனு அளித்த பாஜக!

கரூர் மாவட்டத்தில் கிராம சபை கூட்டங்கள் முறையாக நடத்தப்படுவதில்லை என்றும் 100 நாள் வேலைக்குச் செல்லும் ஆட்களை வைத்து கூட்டம் நடைபெறுவதாக கரூர் மாவட்ட பாஜக பொதுச் செயலாளர் நவீன் குமார் குற்றம் சாட்டியுள்ளார்.

கரூர்: கிராம சபை கூட்டங்கள் கரூர் மாவட்டத்தில் முறையாக நடை பெறுவதில்லை என கரூர் மாவட்ட பாஜக குற்றம் சாட்டி உள்ளனர். கரூர் மாவட்டத்தில் உள்ள 157 ஊராட்சிகளிலும் எதிர்வரும் ஆகஸ்ட் 15 செவ்வாய்க்கிழமை அன்று கிராம சபைக் கூட்டம் நடைபெறவுள்ளதாக மாவட்ட நிர்வாகம் அறிவித்துள்ளது. ஆனால் இந்த கிராம சபைக் கூட்டங்கள் முறையாக பொதுமக்களுக்கு அழைப்பு கொடுத்து நடத்தப்படுவதில்லை என கரூர் மாவட்ட பாஜகவினர் குற்றம்சாட்டி வருகின்றனர்.

மேலும் இது குறித்து, மாவட்ட பொதுச் செயலாளர் நவீன் குமார் தலைமையில் இன்று (ஆக.07) கரூர் மாவட்ட ஆட்சியர் பிரபுசங்கரிடம் புகார் மனு அளித்துள்ளனர். பாரதிய ஜனதா கட்சியின் கரூர் மாவட்ட பொது செயலாளர் நவீன்குமார் ஈடிவி பாரத் செய்திகளுக்கு அளித்த பிரித்யோக பேட்டியில், "கரூர் மாவட்டம் முழுவதும் சிறப்பு கிராம சபை கூட்டங்கள் ஒவ்வொரு முறை நடத்தும் பொழுதும், குறைந்தபட்சம் ஏழு நாட்களுக்கு முன்பு பொதுமக்களுக்கு அறிவிப்பு செய்து, ஊராட்சி நிர்வாகம் பொதுமக்கள் தங்கள் கிராமம் சார்ந்த பொது பிரச்சனைகளை விவாதத்துக்கு எடுத்துக் கொள்ள முன்மொழிவது தான் வழக்கம்.

விவாதத்துக்கு பிறகு ஊராட்சி மன்ற தலைவர் அதனை தீர்மானமாக நிறைவேற்றி நடவடிக்கை மேற்கொள்ள வேண்டும் என்பதே கிராம சபை கூட்டம் தொடர்பான சட்ட விதிமுறை கூறுகிறது. ஆனால் கரூர் மாவட்டத்தில் பல இடங்களில் கிராம சபை கூட்டங்கள் பெயரளவில் நடத்தப்படுகிறது. காலை 10 மணிக்கு தொடங்கி அடுத்த பத்து நிமிடத்தில் கூட்டம் நிறைவடைவதால் கிராம சபை கூட்டத்தால் எந்த பயனும் இல்லை.

கிராம சபைக் கூட்டத்தில் மாநில அரசின் திட்டங்கள், மத்திய அரசின் திட்டங்கள் குறித்து பொது மக்களுக்கு எடுத்துரைத்து அதில் பொது மக்களை பயனடைய செய்ய வேண்டும். ஆனால் அரசு அதிகாரிகள் கிராம சபை கூட்டங்களை முறையாக நடத்ததாமல் சம்பிரதாயத்திற்கு கூட்டம் நடைபெறுவதைப் போல 100 நாள் பணியாளர்களை வைத்து பொதுமக்கள் கலந்து கொண்டதாக ஆவணப்படுத்தப்படுகிறது.

இது தொடர்பாக இன்று கரூர் மாவட்ட ஆட்சியரிடம் புகார் மனு அளிக்கப்பட்டுள்ளது. மாவட்ட ஆட்சியரும் நடவடிக்கை எடுப்பதாக உறுதி அளித்துள்ளார். கரூர் மாவட்டம் முழுவதும் கிராம சபை கூட்டங்கள் இம்முறை முறையாக நடத்தப்படவாட்டால் கரூர் மாவட்ட பாஜக சார்பில் மாவட்ட ஆட்சியர் அலுவலகம் முன்பு மாபெரும் போராட்டம் நடத்துவோம்" எனத் தெரிவித்தார். இந்த செய்தியாளர் சந்திப்பின் போது, கடவூர் தெற்கு ஒன்றிய தலைவர் சுரேஷ், கடவூர் வடக்கு ஒன்றிய தலைவர் ராமர், தாந்தோணி ஒன்றிய பொதுச்செயலாளர் பொன்ராஜ் ராஜேந்திரன் உள்ளிட்டோர் உடன் இருந்தனர்.

இதையும் படிங்க: புழல் சிறையில் அமைச்சர் செந்தில் பாலாஜியுடன் வழக்கறிஞர்கள் ஆலோசனை!