இந்தியாவில் வணிகத்தை மேற்கொள்ள வந்த ஆங்கிலேயர்கள் படிப்படியாக தங்களது ஆதிக்கத்தினை செலுத்த ஆரம்பித்து கடைசியில் இந்தியாவினை தங்களது கட்டுப்பாட்டில் கொண்டுவந்தனர். அதன் பிறகு ஆங்கிலேயர்களின் பிடியில் இருந்து வெளிவந்த இந்தியர்களுக்கு இறுதியாக ஆகஸ்ட் 15, 1947ஆம் ஆண்டு சுதந்திரம் கிடைத்தது.
இந்திய மக்கள் ஆங்கிலேயர்களை எதிர்த்துப் போராடி சுதந்திரம் பெறுவதற்கு 200 ஆண்டுகளுக்கு முன்பே குமரி மாவட்டத்தில் டச்சுப் படைகளை எதிர்த்து வெற்றிவாகை சூடி சுதந்திரத்திற்கு வித்திட்ட வீர வரலாறு உள்ளது. இந்த வெற்றியின் நினைவாக நடப்பட்ட வெற்றி தூணுக்கு இப்போதும் இந்திய ராணுவத்தால் இந்த வெற்றி விழா கொண்டாடப்பட்டு வருகிறது.
திருவிதாங்கூர் மன்னர் மார்த்தாண்டவர்மா ஆட்சி காலத்தில் தற்போதைய குமரி மாவட்ட பகுதிகளைக் கைப்பற்ற டச்சு நாட்டு படைகள் கடல் மார்க்கமாக அதன் தளபதி டிலணாய் தலைமையில் குளச்சலை நோக்கி வந்தனர். திருவிதாங்கூர் மன்னர் படைகளிடம் அப்போது நவீன ரக பீரங்கிகள் ஏதும் இல்லை. ஆனால் டச்சு படைகளிடம் துப்பாக்கிகள் இருந்தன.
இதனால் டச்சு படைகளை எதிர்கொள்ள திருவிதாங்கூர் படைகளுக்கு இயலாத சூழல் இருந்தது. மன்னரின் மதிநுட்பத்தால் போரில் வியூகம் அமைக்கப்பட்டது. அதன்படி ஏராளமான கட்டைவண்டிகளில் பனை மரத் தடிகளை வைத்து பிராங்கிகள் போல் குளச்சல் கடற்கரையில் அணிவகுத்து நிறுத்திவைத்தார்.
கப்பலில் இருந்து பார்த்த டச்சு நாட்டு படைகள் பனைமரத் தடிகளை உண்மையான பிரங்கிகள் என நினைத்து திருவிதாங்கூர் மன்னரிடம் சரணடைந்தனர். 1741ஆம் ஆண்டு ஜூலை மாதம் 31ஆம் தேதி திருவிதாங்கூர் மன்னர் படைகள் டச்சு படைகளை ராஜதந்திரத்தால் வென்றன.
இந்த சம்பவம் நடைபெற்று 278 ஆண்டுகள் முடிந்து 279ஆவது ஆண்டு தற்போது நடந்துவருகிறது. இந்த வெற்றியைக் கொண்டாடும் வகையில் குளச்சல் கடற்கரையில் வெற்றி தூண் ஒன்றையும் மன்னர் நிறுவினார். இந்த வெற்றித்தூணுக்கு இந்திய ராணுவம் ஆண்டு தோறும் ராணுவ அணிவகுப்பு நடத்தி விழா எடுத்து கொண்டாடிவருகிறது.
இந்தியா சுதந்திரம் அடைவதற்கு 200 ஆண்டுகளுக்கு முன்பு சுதந்திரத்திற்கு வித்திட்டு டச்சுக்காரர்களைத் தனது மதிநுட்பத்தால் வென்ற திருவிதாங்கூர் மன்னரையும் அவரது படைவீரர்களையும் இந்த குடியரசு நாளில் நினைவுகூர்வோம்.
இதையும் படிங்க: சைக்கிள் கடைக்காரரிடம் ஒரு ரூபாய் பாக்கிவைத்த சல்மான் கான்
