சர்வதேச சுற்றுலா தலமான கன்னியாகுமரிக்கு ஆண்டுதோறும் உள்நாடு, வெளிநாடு மற்றும் அண்டை மாவட்டங்களிலிருந்தும் தினமும் ஏராளமான சுற்றுலாப் பயணிகள் வந்து செல்வது வழக்கம். கரோனா காரணமாக, கடந்த மார்ச் மாதம் முதல் நாடு முழுவதும் ஊரடங்கு உத்தரவு அமல்படுத்தப்பட்டது. இதனால் மக்கள் அதிகமாக கூடும் இடங்களுக்குச் செல்ல பொதுமக்களுக்கு தடை விதிக்கப்பட்டது.
அதன்படி சுற்றுலாத்தலமான கன்னியாகுமரிக்கும் சுற்றுலாப் பயணிகள் செல்ல தடை விதிக்கப்பட்டது. இதனால் இங்குள்ள வியாபாரிகள் மற்றும் வியாபார நிறுவனப் பணியாளர்கள் வாழ்வாதாரம் இழந்தனர். இந்நிலையில் கடந்த மாதத்திற்கு முன்பு, ஊரடங்கில் பல தளர்வுகள் அறிவிக்கப்பட்டன. இதனால் கோயில்கள் மற்றும் பொது போக்குவரத்து மீண்டும் தொடங்கியது. இதனால் குமரி மாவட்டத்தைச் சேர்ந்த உள்ளூர் சுற்றுலாப் பயணிகள் சுற்றுலா தலமான கன்னியாகுமரிக்கு வரத்தொடங்கினர்.
இந்நிலையில், சமீபத்தில் குமரி மாவட்டம் வந்த முதலமைச்சர் எடப்பாடி பழனிசாமி, குமரி மாவட்டத்திற்கு சுற்றுலாப் பயணிகள் செல்ல விதிக்கப்பட்டிருந்த தடையை நீக்கி உத்தரவிட்டார். இதனைத் தொடர்ந்து தீபாவளியை ஒட்டிய விடுமுறை தினங்களையொட்டி, கன்னியாகுமரிக்கு சுற்றுலாப் பயணிகள் குடும்பம் குடும்பமாக வருகை தந்தனர்.
கன்னியாகுமரிக்கு வந்தவர்கள் திரிவேணி சங்கமம் மற்றும் கடற்கரைப் பகுதியில் அமர்ந்து தங்கள் நேரத்தைச் செலவழித்தனர். பின்னர் அங்குள்ள கடைகளுக்குச் சென்று பொருட்களை வாங்கினர். இதனால் கடந்த சில மாதங்களாக வியாபாரங்கள் இல்லாமல் வாழ்வாதாரம் இன்றி தவித்து வந்த சிறுகடை வியாபாரிகள் மற்றும் உணவக உரிமையாளர்கள் மகிழ்ச்சியடைந்தனர்.
கடந்த சில தினங்களுக்கு முன்பு, குமரிக்கு வந்த தமிழ்நாடு முதலமைச்சர் எடப்பாடி பழனிசாமி கடலின் நடுவே அமைந்துள்ள விவேகானந்தர் நினைவு மண்டபம் மற்றும் திருவள்ளுவர் சிலைக்கு படகு போக்குவரத்து விரைவில் தொடங்கப்படும் என்று அறிவித்து இருந்தார். ஆனால், சுற்றுலாப் படகு போக்குவரத்து தற்போது வரை தொடங்கப்படாததால், கன்னியாகுமரி வந்த சுற்றுலாப் பயணிகள் ஏமாற்றம் அடைந்தனர்.
இதுகுறித்து கடற்கரைப் பகுதியில் வியாபாரம் செய்யும் சுபாஷ் கூறியதாவது, 'கரோனா ஊரடங்கு காரணமாக கடந்த ஆறு மாதத்திற்கும் மேற்பட்ட காலமாக, கடற்கரைக்கு பொதுமக்கள் அனுமதிக்கப்படவில்லை. இதனால் சுற்றுலாப்பயணிகளை நம்பி தொழில் செய்து வந்த வியாபாரிகள் கடுமையாகப் பாதிக்கப்பட்டனர்.
தற்போது தடை நீக்கப்பட்டுள்ள நிலையில் நெல்லை, குமரி, தூத்துக்குடி உள்ளிட்ட மாவட்டங்களைச் சேர்ந்த சுற்றுலாப் பயணிகள் பெருமளவில் குமரி வந்துள்ளனர். குமரி கடற்கரைக்கு விதிக்கப்பட்டுள்ள தடை நீக்கப்பட்டாலும், விவேகானந்தர் பாறை, திருவள்ளுவர் சிலை செல்வதற்கான தடை தொடர்ந்து நீடித்து வருகிறது. இதனால் சுற்றுலாப் பயணிகள் ஏமாற்றம் அடைந்துள்ளனர்.
எனவே, இந்த தடையை நீக்கி, படகு போக்குவரத்தை உடனடியாக தொடங்க வேண்டும். இதனால் சுற்றுலா வரும் பயணிகளின் எண்ணிக்கை அதிகரிப்பதோடு மட்டுமல்லாமல், சுற்றுலாப் பயணிகளை நம்பி வியாபாரம் செய்துவரும் எங்களின் தொழிலும் பாதிப்படையாமல் நடக்கும்' என்று கூறினார்.
குமரி கடற்கரைப் பகுதிக்கு குடும்பத்துடன் சுற்றுலா வந்த பிரவீனா கூறியதாவது, 'தீபாவளிப் பண்டிகை விடுமுறையை ஒட்டி, கிடைத்த ஓய்வு நேரத்தில் கன்னியாகுமரி கடற்கரைக்கு குடும்பத்துடன் வந்துள்ளோம். நீண்ட நாட்களுக்குப் பிறகு கடற்கரைக்கு வரமுடிந்தது மகிழ்ச்சி அளிக்கிறது. கரோனா காலகட்டத்திலும் கடற்கரை பகுதிக்கு வந்துள்ளோம். நீண்ட நாட்களுக்குப் பிறகு இவ்வளவு மக்கள் கூட்டத்தில் இருப்பது மகிழ்ச்சியாக உள்ளது. பழைய இயல்பு வாழ்க்கைக்கு மீண்டு வந்தது போல் உள்ளது' என மகிழ்ச்சி பொங்கத் தெரிவித்தார்.
இதையும் படிங்க: பரபரப்பான ரோடு சுயஊரடங்கால் அமைதி - நகரங்களின் புகைப்படத்தொகுப்பு
