கன்னியாகுமரி: களியல் பகுதியைச்சேர்ந்தவர் செல்வன். இவர் அந்தப்பகுதியிலுள்ள சந்திப்பில் பழக்கடை நடத்தி வருகிறார். இவர் நேற்றிரவு (ஆக. 21) கடையை மூடிவிட்டு வீட்டிற்குச்சென்ற நிலையில் இன்று (ஆக.22) அதிகாலை டாரஸ் லாரியில் ஜல்லிக்கற்களை ஏற்றிக்கொண்டு வந்து கடையை இடித்து தள்ளி, கடைக்குள் ஜல்லிகளைத் தட்டிச் செல்ல முயன்றுள்ளனர்.
இதனை கடையின் எதிர்புறம் வாடகை வீட்டில் வசிக்கும் கடை ஊழியர் கண்டு, செல்வனுக்குத் தகவல் தெரிவித்தார். இதனைக்கேட்டு அலறியடித்துக் கொண்டு ஓடி வந்த செல்வன், கடையைத் திறந்து பார்த்தபோது கடையின் வெளியே அதே பகுதியைச்சேர்ந்தவரான கமலைய்யன் (65), அஜின் மற்றும் அவரது மாமனார் ஆகியோர் சேர்ந்து கடைக்குள் புகுந்து மறைத்து வைத்திருந்த கத்தியால் சரமாரியாக செல்வனை குத்தினர்.
இதனை அந்தப்பகுதியில் இருந்த காவல் துறையினர் வேடிக்கை பார்த்ததாகத் தெரிகிறது. முன்விரோதம் காரணமாக,இத்தாக்குதல் முடிந்தவுடன் காவல் அலுவலர் ஒருவர் கடைக்குள் புகுந்து தாக்குதல் நடத்தியவர்களை விடுவித்து, செல்வனை அப்புறப்படுத்த முயன்றுள்ளார்.
இதற்கு செல்வன் எதிர்ப்புத்தெரிவிக்கவே காவல் துறையினர் உட்பட தாக்குதல் நடத்தியவர்கள் அனைவரும் வெளியே வந்து நின்றுள்ளனர். கடை உரிமையாளருக்கு தாக்குதலின்போது ஏற்பட்ட காயத்தின் காரணமாக ரத்தம் வழிந்த நிலையிலும் காவல் துறையினர் குற்றவாளிகளைக் கைது செய்யாமல் விட்டுள்ளதாக கூறப்படுகிறது.
மேலும் தாக்குதலுக்குள்ளான செல்வன் காவல் துறையினரின் உதவியுடன் தான் தாக்குதல் நடந்துள்ளதாக குற்றம் சாட்டுகிறார்.
இதையும் படிங்க: ஹலோ நான் டிஜிபி பேசுறேன்...போலீஸ் அதிகாரியிடமே 7.5 லட்ச ரூபாய் ஆன்லைனில் மோசடி
