கன்னியாகுமரி மாவட்டம் நாகா்கோவில் அருகே இராமன்புதூர் பகுதியைச் சேர்ந்தவர்கள் அஸ்வின், ஆசிக். இவர்களது நண்பர் தளவாய்புரத்தைச் சேர்ந்த எமலின். பொறியாளரான எமலின், அவரது நண்பர்கள் அஸ்வின், ஆசிக் ஆகிய மூன்று பேரும் ஒரு காரில் மேற்கு கடற்கரை சாலையில் ஈத்தாமொழியிலிருந்து ராஜாக்கமங்கலம் நோக்கி வந்துகொண்டிருந்தனர்.
ராஜாக்கமங்கலம் அருகே கடல்சார் ஆராய்ச்சி நிறுவனம் வளைவில் வரும்போது திடீரென கார் கட்டுப்பாட்டை இழந்து சாலையோரத் தடுப்பு வேலியில் மோதி, உப்பளத்தில் உள்ள தண்ணீரில் பாய்ந்தது. இதில் காரிலிருந்த மூன்று பேரும் படுகாயமடைந்தனர். அவர்களில் எமலின் சம்பவ இடத்திலேயே உயிரிழந்தார்.
இந்த விபத்தில் படுகாயங்களுடன் உயிருக்குப் போராடிய இருவரையும் அப்பகுதி பொதுமக்கள் மீட்டு தனியார் மருத்துவமனையில் சிகிச்சைக்காகச் சேர்த்தனர். அங்கு அவர்களுக்கு தீவிர சிகிச்சை அளிக்கப்பட்டுவருகிறது. இந்த விபத்து குறித்து ராஜாக்கமங்கலம் காவல் துறையினர் வழக்குப்பதிவு செய்து விசாரணை நடத்திவருகிறார்கள்.
இதையும் படிங்க: ஆற்றில் வேன் கவிழ்ந்து விபத்து -12 பேர் காயம்!
