கன்னியாகுமரி மாவட்டம் நீரோடி பகுதியைச் சேர்ந்த மீனவர்களான ஸ்டான்லி (47), ஜான் போஸ்கோ (46), சகாயம் (32), நிக்கோலஸ் (40), ராஜு (50) ஆகிய ஐந்து மீனவர்களும் கடந்த 13ஆம் தேதி கேரள மாநிலம், கொல்லம் மாவட்டத்தில் உள்ள நீண்டகரை துறைமுகத்திலிருந்து நாட்டுப்படகில் கடலில் மீன் பிடிக்க சென்றனர்.
இந்நிலையில், கடலில் சீற்றம் அதிகமாக இருந்ததால் கரைக்கு திரும்பாமல், கடலில் நங்கூரமிட்டு படகை நிறுத்தியுள்ளனர். இன்று காலை மீனவர்கள் சென்ற நாட்டுப்படகு சிதைந்த நிலையில் கடற்கரை ஓரமாக ஒதுங்கியது. அதிலிருந்த 5 மீனவர்களும் மாயமாகி இருந்தனர்.
இதுகுறித்து கடலோர காவல் படைக்கு தகவல் தெரிவிக்கப்பட்டது. இதனையடுத்து கடலோர காவல் படை போலீசாரும், சக மீனவர்களும் மாயமான மீனவர்களைத் தேடி வருகின்றனர்.
இது குறித்து தெற்காசிய மீனவர் கூட்டமைப்பு தலைவர் அருட்தந்தை சர்ச்சில், மாயமான 5 குமரி மாவட்ட மீனவர்களையும் உடனடியாக மீட்க வேண்டும் என்று மத்திய, மாநில அரசுக்கு கோரிக்கை விடுத்துள்ளார்.
