உள்ளாட்சித் தேர்தலில் திமுக வெற்றியை ஏற்றுக்கொள்ள முடியாது - உடுமலை ராதாகிருஷ்ணன்

காஞ்சிபுரம்: உள்ளாட்சித் தேர்தலில் திமுக வெற்றி பெற்றதாகக் கூறுவதை ஒருபோதும் ஏற்றுக்கொள்ள முடியாது என உடுமலை ராதாகிருஷ்ணன் தெரிவித்துள்ளார்.

காஞ்சிபுரம் காமாட்சி அம்மன் கோயிலில் 24 மனை தெலுங்கு செட்டியார் சங்கம் சார்பில் விளக்கு பூஜை, சிறப்பு யாகம் உள்ளிட்ட பல்வேறு நிகழ்ச்சிகள் நடைபெற்றது. இந்நிகழ்ச்சியில் கலந்துகொண்ட கால்நடைத் துறை அமைச்சர் உடுமலை ராதாகிருஷ்ணன் செய்தியாளர்களை சந்தித்து பேசினார்.

அப்போது, "உள்ளாட்சித் தேர்தலை பொறுத்தவரை அதிமுக முழு வெற்றியை பெற்றுள்ளது. அதிமுகவிற்கு வாக்களித்தவர்கள் அனைவரும் ஏழை நடுத்தர மக்களை சார்ந்தவர்களாவர். ஊராட்சி மன்றத் தலைவர், ஊராட்சி வார்டு உறுப்பினர், ஒன்றியக் குழு உறுப்பினர், மாவட்ட குழு உறுப்பினர் என நான்கு வாக்குகளை அளிக்கிறார்கள்.

இவ்வாறு நான்கு பதவிகளுக்கு கிராமப்பகுதி மக்கள் வாக்களிக்கும்போது பெரும்பாலான வாக்குகள் செல்லாத வாக்குகளாக மாறியுள்ளது. அவ்வாறு செல்லாத வாக்குகளாக கருதப்படும் அனைத்தும் அதிமுகவின் வாக்குகளாகும். இதுபோன்ற சூழ்நிலையிலும் நாங்கள் வெற்றி பெற்றுள்ளோம். இதனால் பல இடத்தில் திமுக வெற்றி பெற்றதாக ஒருபோதும் ஏற்றுக்கொள்ள முடியாது" என்றார்.

இதையும் படிங்க: இரு வேட்பாளர்கள் இடையே மோதல்: வெளியான வீடியோ காட்சி!