காஞ்சிபுரம் பெருநகராட்சிக்கு உட்பட்ட 51 வார்டுகளிலும் நகராட்சியின் சார்பில், குழாய்கள் அமைக்கப்பட்டு குடிநீர் வழங்கப்பட்டு வருகிறது. நகராட்சி சார்பில் குடிநீர் வழங்க அமைக்கப்பட்டுள்ள குடிநீர் குழாய்களில், பல்வேறு தெருக்களில் ஒரு சிலர் மின் மோட்டார்கள் அமைத்து குடிநீரை, தங்களின் பயன்பாட்டிற்கு உறிஞ்சி எடுத்துக் கொள்வதால் பெரும்பாலான மக்கள் குடிநீர் வராமல் அவதிப்பட்டு வந்தனர்.
இந்நிலையில் இன்று காஞ்சிபுரம் பெருநகராட்சிக்கு உட்பட்ட அறப்பெரும் செல்வி தெருவில் குடிநீர் முறையாக வரவில்லை என காஞ்சிபுரம் பெருநகராட்சி ஆணையர் மகேஸ்வரிக்கு பொதுமக்கள் புகார் தெரிவித்தனர். முறையாக குடிநீர் அளிக்கப்பட்டு வரும் நிலையில் பொதுமக்கள் புகார் தெரிவித்ததால், அறப்பெரும் செல்வி தெருவில் ஆணையர் மகேஸ்வரி காவல் துறையின் உதவியுடன் வீடுகளில் அமைக்கப்பட்டுள்ள குழாய்களில் திடீர் ஆய்வு மேற்கொண்டார்.
அப்போது உரிய அனுமதி இல்லாமல் சட்ட விரோதமாக வீடுகளில் குடிநீர் குழாய்களில் அமைக்கப்பட்டிருந்த மின் மோட்டார்களை பறிமுதல் செய்ய, பெருநகராட்சி ஊழியர்களுக்கு உத்தரவிட்டார். பெருநகராட்சி ஆணையரின் உத்தரவின்பேரில் நகராட்சி ஊழியர்கள் சட்டவிரோதமாக அமைக்கப்பட்டிருந்த ஒன்பது மின் மோட்டார்களை பறிமுதல் செய்து வண்டிகளில் ஏற்றி எடுத்துச் சென்றனர். இதன் காரணமாக அறப்பெரும் செல்வி தெருவில் பெரும் பரபரப்பு ஏற்பட்டது.
இதையும் படிங்க... சட்டவிரோத மது விற்பனை: தடுத்து நிறுத்தக்கோரி புகார்!
