தமிழ்நாட்டில் நகர்ப்புற உள்ளாட்சி தேர்தல் வரும் பிப்ரவரி 19ஆம் தேதி நடைபெற உள்ள நிலையில் இன்று (ஜன.28) முதல் மாநகராட்சி, நகராட்சி, பேரூராட்சி அலுவலகங்களில் வேட்பாளர்கள் தங்கள் வேட்புமனுவை தாக்கல் செய்யலாம் என அறிவிக்கப்பட்டது.
காஞ்சிபுரம் மாவட்டத்தில் காஞ்சிபுரம் மாநகராட்சி, மாங்காடு மற்றும் குன்றத்தூர் என இரண்டு நகராட்சிகள், ஶ்ரீபெரும்புதூர், உத்திரமேரூர், வாலாஜாபாத் என 3 பேரூராட்சிகளுக்கு நகர்ப்புற உள்ளாட்சி தேர்தல் நடைபெறுகிறது. மாநகராட்சியில் 51 வார்டுகளும், குன்றத்தூர் நகராட்சியில் 30 வார்டுகளும், மாங்காடு நகராட்சியில் 27 வார்டுகளும், ஸ்ரீபெரும்புதூர் பேரூராட்சியில் 15 வார்டுகளும், வாலாஜாபாத் பேரூராட்சியில் 15 வார்டுகளும், உத்திரமேரூர் பேரூராட்சியில் 18 வார்டுகளும் என மொத்தம் 156 வார்டுகள் உள்ளன.
நடைபெறுகின்ற நகர்புற உள்ளாட்சி தேர்தலில் ஆண் வாக்காளர்கள் 1 லட்சத்து 33 ஆயிரத்து 124 பேரும், பெண் வாக்காளர்கள்1 லட்சத்து 42 ஆயிரத்து 691 பேரும், இதர வாக்காளர்கள் 28 பேர் என மொத்தம் 2 லட்சத்து 75 ஆயிரத்து 847 பேர் வாக்களிக்க உள்ளனர்.
இதில் அதிகபட்சமாக காஞ்சிபுரம் மாநகராட்சியில் 2 லட்சத்து 18 ஆயிரத்து 921 பேரும், குறைந்தபட்சமாக வாலாஜாபாத் பேரூராட்சியில் 13 ஆயிரத்து 641 பேரும், உத்திரமேரூர் பேரூராட்சியில் 21 ஆயிரத்து 676 பேரும், ஸ்ரீபெரும்புதூர் பேரூராட்சியில் 21ஆயிரத்து 629 பேரும் இத்தேர்தலில் வாக்களிக்க உள்ளனர்.
வேட்புமனு தாக்கல் செய்யும் வகையில் தேர்தல் அலுவலர் உதவி தேர்தல் அலுவலர்கள் என பலர் நியமிக்கப்பட்டு மண்டலம் வாரியாக அலுவலர்கள் நியமிக்கப்பட்டுள்ளனர். காஞ்சிபுரம் மாநகராட்சியில் தேர்தல் அலுவலர் மற்றும் உதவி தேர்தல் அலுவலர்கள் என ஒன்பது பேர் நியமிக்கப்பட்டு தேர்தல் பணியில் ஈடுபட்டுள்ளனர்.
வேட்புமனு தாக்கல் செய்யப்படும் இடங்களான மாநகராட்சி, நகராட்சி, பேரூராட்சி ஆகிய இடங்களில் காவல் துறையினர் இன்று காலை 7 மணி முதலே பாதுகாப்பு பணியில் ஈடுபட்டு வருகின்றனர்.
வேட்புமனு நடைபெறும் பகுதிகளில் காஞ்சிபுரம் மாவட்ட காவல் கண்காணிப்பாளர் டாக்டர் எம்.சுதாகர் தலைமையில் மாவட்ட கூடுதல் காவல் கண்காணிப்பாளர்கள், காவல் ஆய்வாளர்கள் உள்ளிட்டோர் அடங்கிய காவல்துறையினர் தொடர்ந்து ரோந்து பணியில் ஈடுபட்டும், பாதுகாப்புகள் குறித்து ஆய்வும் மேற்கொண்டு வருகின்றனர்.
இதனையடுத்து நடைபெறவுள்ள நகர்புற உள்ளாட்சி தேர்தலையொட்டி பாதுகாப்பு பணியில் காஞ்சிபுரம் மாவட்டத்தை சேர்ந்த ஊர்க்காவல் படையினரும் காவல்துறையினருடன் இணைந்து தேர்தல் பணியில் ஈடுபட்டு உள்ளனர்.
காஞ்சிபுரம் மாநகராட்சியில் பணிபுரிய வரும் மாநகராட்சி ஊழியர்கள் அனைவரும் அடையாள அட்டை அணிந்து பணிக்கு வர அறிவுறுத்தப்பட்டுள்ளனர். மேலும் வேட்பு மனு பெறுதல் மற்றும் கொடுத்தல் ஆகியவற்றிற்கு செல்லும் நபர்களை தீவிர சோதனையிட்ட பின்னரே காவல்துறையினர் அனுமதித்து வருகின்றனர்.
மேலும் வேட்பு மனு பெற வருபவர்களும், அளிக்க வருபவர்களுக்கும் கிருமி நாசினி அளித்தும், உடல் வெப்ப பரிசோதனைகளும் மேற்கொள்ளப்பட்டு வருகிறது.
தேர்தலில் போட்டியிட விரும்புவோர் ஒரு ரூபாயை கட்டணமாக செலுத்தி ஆர்வத்துடன் வேட்பு மனுக்களை பெற்றுச் செல்கின்றனர்.
வேட்பாளர் வேட்புமனு தாக்கல் செய்யும் பகுதிகளில் சிசிடிவி காட்சிகள் மூலம் தொடர் கண்காணிப்பில் காவல்துறையினர் ஈடுபட்டு வருகின்றனர்.
இதையும் படிங்க: கைக்குழந்தை இருக்கையில் ஏன் தற்கொலை செய்துகொண்டார் எடியூரப்பாவின் பேத்தி?
