காஞ்சிபுரம் மாவட்டம் திருப்போரூர் அருகே உள்ள மானாமதி கங்கையம்மன் கோயில் பின்புறம் குளத்தைத் தூர்வாரும் பணியில் நேற்று ஈடுபட்டிருந்த இளைஞர்கள் குளத்தில் புதையல் இருப்பதைக் கண்டு வெளியே எடுத்துவந்து பிரித்தனர். அப்போது, எதிர்பாராத விதமாக அந்த பொருள் வெடித்து விபத்துக்குள்ளனாது. இதில், இரண்டு இளைஞர்கள் உயிரிழந்தனர்.
இந்த விபத்து குறித்து, வெடிகுண்டு நிபுணர் குழு ஆய்வு மேற்கொண்டது. இந்த ஆய்வில், காஞ்சிபுரம் மாவட்டம் மானாமதி பகுதியில் வெடித்த வெடிகுண்டு ராணுவத்திற்குச் சொந்தமான ராக்கெட் லாஞ்சர் என்று முதல் கட்ட விசாரணையில் தெரிய வந்தது. 10 கிலோ மீட்டர் தொலைவில் உள்ள அனுமந்தபுரம் பகுதியில் ராணுவத்திற்கான துப்பாக்கிச்சூடு தளம் உள்ளது என்றும், அங்கிருந்து இயக்கப்பட்ட வெடிகுண்டு வெடிக்காமல் குளத்தில் விழுந்திருக்கலாம் எனவும் கூறப்படுகிறது.
இதை ஆய்வு செய்த மருதம் வெடிகுண்டு சோதனைக்குழு, வெடித்தது ராணுவ வெடிகுண்டு என தெரிவித்தது. இதனையடுத்து, வெடிகுண்டு தடயவியல் துறைக்கு அந்த வெடிகுண்டு அனுப்பி வைக்கப்பட்டுள்ளது என்று காவல் துறையினர் தெரிவித்துள்ளனர். மேலும், இந்த வெடிகுண்டை எடுத்து வந்து இயக்கிய போது வெடித்து இருக்கலாம் என்ற கோணத்திலும் விசாரணை நடந்துவருகிறது.
இந்நிலையில், இன்று காஞ்சிபுரம் மாவட்ட காவல் துணை தலைவர் தேன்மொழி தலைமையில் காவல் துறையினர் மற்றும் 20க்கும் மேற்பட்ட வெடிகுண்டு சோதனை நிபுணர் குழுவினர் சோதனையில் ஈடுபட்டனர். அப்போது, மேலும் ஒரு வெடிகுண்டு கண்டெடுக்கப்பட்டது.
இதனைத் தொடர்ந்து, சென்னையில் இருந்து வெடிகுண்டு நிபுணர் சோதனைக் குழுவினர் திருப்போரூர் விரைந்துள்ளனர். வெடிகுண்டு வெடித்ததில் கங்கையம்மன் கோயில் சுவர், அருகே இருந்த வீடுகளும் சேதமடைந்தன. வெடிகுண்டு சோதனை நிபுணர்கள் மேற்கொண்ட ஆய்வில், மேலும் ஒரு வெடிபொருள் கண்டெடுக்கப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.
