சென்னை: கள்ளக்குறிச்சி பள்ளி மாணவி மரணத்தை அடுத்து கடந்த ஜூலை 17ஆம் தேதி பள்ளி வளாகத்தில் வன்முறை வெடித்தது. இவ்வன்முறையில் பள்ளியில் இருந்த பொருட்கள், பள்ளிப் பேருந்துகள் மற்றும் காவல்துறை வாகனங்கள் சேதப்படுத்தப்பட்டன.
இதுதொடர்பாக சின்னசேலம் போலீசார் சிசிடிவி காட்சிகள் அடிப்படையில் சிலர் மீது வழக்குப்பதிவு செய்து கைது செய்தனர். இதில் கைது செய்யப்பட்ட விழுப்புரம் மாவட்டம், தொழுவந்தாங்கலைச் சேர்ந்த தந்தைப் பெரியார் திராவிடர் கழக மாவட்டச்செயலாளர் பிரபு, ஜாமீன் கோரி சென்னை உயர் நீதிமன்றத்தில் மனுதாக்கல் செய்திருந்தார்.
அந்த மனுவில், 'வன்முறை நிகழ்ந்தபோது சம்பவ இடத்தில் தான் இல்லை எனவும், எந்த வாட்ஸ்அப் குழுவுக்கும் தான் அட்மின் இல்லை' என்றும் தெரிவித்துள்ளார்.
முதலில் குமார் என்பவரை முதல் எதிரியாக குறிப்பிட்டிருந்த போலீசார், பிறகு உள்நோக்கத்துடன் தன்னை முதல் எதிரியாக சேர்த்துள்ளதாகவும் தெரிவித்துள்ளார்.
இந்த மனு, நீதிபதி இளந்திரையன் முன் விசாரணைக்கு வந்தபோது, மனுதாரர் காவல் ஆய்வாளரை தாக்கியதுடன், 15 லட்சம் ரூபாய் மதிப்புள்ள பொருட்களை சேதப்படுத்தியுள்ளதால் ஜாமீன் வழங்கக்கூடாது என காவல் துறை தரப்பில் ஆட்சேபம் தெரிவிக்கப்பட்டது.
இருதரப்பு வாதங்களையும் கேட்ட நீதிபதி, 50 ஆயிரம் ரூபாயை வழக்கு எண் பெயரில் டெபாசிட் செய்யும்படி கூறி, பிரபுவுக்கு ஜாமீன் வழங்கி உத்தரவிட்டார்.
மேலும், ஆறு வாரங்களுக்குத் தினமும் காலை, மாலை என இரு வேளையும் சின்னசேலம் போலீசார் முன் ஆஜராகி கையெழுத்திட வேண்டும் எனவும், விசாரணைக்குத் தேவைப்படும்போது ஆஜராக வேண்டும் எனவும் நீதிபதி நிபந்தனை விதித்து உத்தரவிட்டுள்ளார்.
இதையும் படிங்க: ஆளுநருக்கு ஓரிரு நாட்களில் விளக்கம் அளிக்கப்படும் - சித்த மருத்துவப்பல்கலை. விவகாரத்தில் அரசு பதில்
