தமிழ்நாடு முழுவதும் வடகிழக்கு பருவமழை தீவிரமடைந்துள்ளதன் எதிரொலியாக பல ஆண்டுகளுக்குப் பிறகு மாநிலம் முழுவதும் பரவலாக நல்ல மழை பெய்து அனைத்து நீர் நிலைகளும் நிரம்பி வருகிறது. அதன் ஒருபகுதியாக ஈரோடு மாவட்டம் சத்தியமங்கலம் அருகே உள்ள பவானிசாகர் அணை பல ஆண்டுகளுக்குப் பிறகு முழுக்கொள்ளளவான 105 அடியை எட்டியுள்ளது.
அணையிலிருந்து கடந்த சில நாள்களில் அதிகபட்சமாக 8 ஆயிரத்து 160 கனஅடி தண்ணீர் வெளியேற்றப்பட்ட நிலையில் இன்று காலை முதல் அணையிலிருந்து 3 ஆயிரத்து 500 கனஅடி வீதம் தண்ணீர் வெளியேற்றப்பட்டு வருகிறது. இதனால் ஈரோடு மாவட்டம் பவானி அருகேயுள்ள காலிங்கராயன் அணைக்கட்டு நிரம்பி அதன் முழுக் கொள்ளளவான 32 அடியை எட்டியுள்ளது. அணையிலிருந்து வெளியேறும் உபரி நீர் அணைக்கட்டின் அனைத்துப் பகுதிகளிலும் நிரம்பி கடல் போல் காணப்படுகிறது.
இதனைத் தொடர்ந்து, அந்தியூர், பவானி உள்ளிட்ட பகுதிகளில் தொடர்ந்து மழை பெய்து வருவதன் காரணமாக அப்பகுதியிலுள்ள நீர் நிலைகள் நிரம்பி அதிலிருந்தும் வெளியேற்றப்படும் உபரி நீரும் காலிங்கராயன் அணைக்கட்டுக்கு வந்து சேர்வதால் வழக்கத்தை விட நீர் நிரம்பி காணப்படுகிறது.
அணைக்கட்டிலிருந்து காவிரி ஆற்றிற்கு நிமிடத்திற்கு 10 ஆயிரத்து 200 கனஅடி வீதமும், காளிங்கராயன் கால்வாய்க்கு 250 கனஅடி வீதமும் மொத்தம் 10 ஆயிரத்து 450 கனஅடி நீர் வெளியேற்றப்பட்டு வருகிறது. பல ஆண்டுகளுக்குப் பிறகு காலிங்கராயன் அணைக்கட்டு முற்றிலும் நிரம்பி கடல் போல் காட்சியளிப்பதை பவானி, அதன் சுற்றுவட்டாரப் பகுதிகளைச் சேர்ந்த பொதுமக்கள் ஆர்வமுடன் கண்டுகளித்து வருகின்றனர்.
மேலும் அதிகளவிலான தண்ணீர் காவிரி ஆற்றில் திறந்து விடப்பட்டு அது வீணாக கடலில் கலப்பதைத் தடுத்து நிறுத்தி பொதுமக்களுக்கு குடிநீர் தேவையை பூர்த்தி செய்திடவும், விவசாயிகளுக்கு பாசனத் தேவைகளுக்கு நிரந்தரத் தீர்வு காணவும் தடுப்பணைகளை கட்டிட வேண்டும் என்று கோரிக்கை விடுக்கப்பட்டுள்ளது.
இதையும் படிங்க: 40 ஆண்டுகளுக்குப் பிறகு முழு கொள்ளளவை எட்டிய பவானிசாகர் அணை!
