ஈரோடு: தாளவாடி மலைப்பகுதியில் உள்ள தொட்டகாஜனூர், இரியபுரம், தர்மபுரம், திகினாரை கிராமப் பகுதிகளில் ஒற்றை காட்டு யானை தினமும் இரவில் விவசாய நிலங்களில் புகுந்து பயிர்களை சேதப்படுத்தி வருகிறது. கடந்த 4 தினங்களுக்கு முன்பு தொட்டகாஜனூர் கிராமத்தைச் சேர்ந்த விவசாயி மல்லப்பா என்பவரை மிதித்துக் கொன்றது.
இதையடுத்து வனத்துறை மூலம் ஆனைமலையில் இருந்து சின்னத்தம்பி மற்றும் ராஜவர்தன் என இரண்டு கும்கி யானைகள் வரவழைக்கப்பட்டுள்ளது. இந்நிலையில் வெள்ளிக்கிழமை தாளவாடி வனத்துறையினர் மற்றும் கும்கி யானையுடன் வந்த வனக்குழுவினர் இணைந்து இரவு நேரத்தில் கிராமங்களில் புகுந்து அட்டகாசம் செய்யும் காட்டு யானை வனப்பகுதியில் உள்ளதா என ரோந்து பணி மேற்கொண்டனர்.
யானை வனப்பகுதியில் இருக்கும் இடத்தை வனக்குழுவினர் கண்டறிந்துள்ளதாகவும், இரவு நேரத்தில் வனத்தை விட்டு ஆட்கொல்லி யானை வெளியேறும் போது கும்கி யானைகளை பயன்படுத்தி ஆட்கொல்லி யானையை அடர்ந்த வனப் பகுதியில் விரட்டியடிக்க திட்டமிட்டுள்ளதாக வனத்துறை அதிகாரிகள் தெரிவித்துள்ளனர்.
இதற்கென அப்பகுதியில் வனத்துறை ஊழியர்கள் பல்வேறு குழுக்களாக பிரிந்து ரோந்துப்பணி மேற்கொண்டு வருகின்றனர்.
இதையும் படிங்க: 2 பேரை கொன்ற காட்டு யானையை பிடிக்க களமிறங்கிய கும்கி யானைகள்!!
