ஈரோடு மாவட்டம் பவானி அருகேயுள்ள காளிங்கராயன்பாளையத்தில் வேதகிரி, இளந்தளிர், சுரேஷ் ஆகிய மூன்று பேரும் இணைந்து சன் மைக்ரோ நிறுவனத்தை கடந்த சில மாதங்களுக்கு முன் தொடங்கினர். தங்களது நிறுவனத்தில் ஊழியர்கள் பணிக்கு படித்த ஆண், பெண் தேவை என உள்ளூர் தொலைக்காட்சியில் விளம்பரப்படுத்தியுள்ளனர்.
அப்பகுதியில் உள்ளவர்களை நம்ப வைக்க கன்னியாகுமரி மாவட்டத்தைத் தலைமையிடமாகக் கொண்டு தங்களது நிதி நிறுவனம் செயல்படுவதாக விளம்பரப்படுத்தியுள்ளனர். காளிங்கராயன்பாளையத்தைச் சேர்ந்த 30க்கும் மேற்பட்ட ஆண்களையும், பெண்களையும் அந்நிறுவனத்தில் பணியில் அமர்த்தி மக்களிடையே தங்கள் நிறுவனம் குறித்த நம்பகத்தன்மையையும் அதிகரித்துள்ளனர்.
இதில், மகளிர் சுய உதவிக் குழுவின் மூலமாக கடன் பெறும் பெண்கள் 1,250 ரூபாய், ரூ.1 லட்சம் தனிநபர் கடனுக்கு 5 ஆயிரம் ரூபாய், ரூ. 2 லட்சம் தனிநபர் கடனுக்கு 10 ஆயிரம் ரூபாய், ரூ. 3 லட்சம் தனிநபர் கடனுக்கு 15 ஆயிரம் ரூபாய் முறையே முன்பணம் கட்ட வேண்டும். அப்படி, பணம் கட்டினால் வாடிக்கையாளர்கள் வங்கிக் கணக்கில் கடன்தொகை தானாகவே வந்து சேரும் என்று பரப்புரை செய்யப்பட்டுள்ளது.
இதனை நம்பி 1,300 பேர் முன்பணம் செலுத்தியுள்ள நிலையில், அடுத்த நாள் அந்நிறுவனம் மொத்தமாகப் பூட்டப்பட்டிருந்தது. இந்தச் சம்பவம் சீட்டுப் போட்டவர்களுக்கு மட்டுமின்றி அங்கு பணியாற்றியவர்களுக்கும் கடும் அதிர்ச்சியை ஏற்படுத்தியது. சீட்டுப்பணம் மொத்தத்தையும் எடுத்துக் கொண்டு பங்குதாரர்கள் மூவரும் தப்பித் தலைமறைவாகியது குறித்து பாதிக்கப்பட்டவர்கள் 100க்கும் மேற்பட்டவர்கள் மாவட்ட காவல்துறை கண்காணிப்பாளர் தங்கதுரையிடம் கடந்த வாரம் புகார் மனுக்களை வழங்கியுள்ளனர்.
சன் மைக்ரோ நிறுவனம் என்ற பெயரில் போலியாக நிறுவனத்தை நடத்தி 1,300 பேரை ஏமாற்றிச் சென்றவர்கள் மீது நடவடிக்கை எடுத்து பணத்தை திரும்பப் பெற்றுத் தருமாறு கேட்டுக் கொண்டனர். ஆனால், இந்த வழக்கில் காவல் துறை விரைவாக நடவடிக்கை எடுக்கவில்லை எனக் கூறப்படுகிறது. இதனிடயே, பணத்தைச் செலுத்தி ஏமாந்த நபர்கள் அங்கு பணிபுரிந்த ஊழியர்களைச் சந்தேகப்படவே, தலைமறைவான மூன்று பேரையும் பிடிக்க ஊழியர்கள் களத்தில் இறங்கியுள்ளனர்.
மூன்று குழுவாகப் பிரிந்து, தப்பித் தலைமறைவான மூவர் குறித்த தகவல்களையும் புகைப்படங்களுடன் தமிழ்நாடு முழுவதும் பரவலாக்கினர். மூன்று நபர்களில் ஒருவர் திருச்சியில் தங்கியிருப்பதாக வந்த தகவலையடுத்து, ஊழியர்கள் அந்த இடத்திற்கு விரைந்து சென்று வேதகிரி என்பவரை அவர் தங்கியிருந்த அறைக்குள் சுற்றி வளைத்துப் பிடித்துள்ளனர். பின்னர், பாதுகாப்புடன் கொண்டு வந்து ஈரோடு மாவட்ட குற்றப்பிரிவு காவல்துறையினரிடம் ஒப்படைத்தனர்.
மேலும், இருவரில் ஒருவர் தஞ்சாவூரிலும், மற்றொருவர் விழுப்புரத்திலும் மறைந்திருப்பதாக வந்த தகவலையடுத்து பணியாற்றியவர்கள் மீண்டும் இரண்டு குழுவாகப் பிரிந்து அவர்களைத் தேடிச் சென்றுள்ளனர். காவல் துறையினர் சரியான நடவடிக்கை எடுக்காததால், ஏமாற்றும் நிறுவனத்தில் பணியாற்றிய ஊழியர்களே இப்பணியை தொடர்ந்து மேற்கொண்டு வருகின்றனர்.
இதையும் படிங்க:போலி நகைகளை வைத்து வங்கியில் சுமார் 25 லட்சம் ரூபாய் மோசடி!
