ஈரோடு மாவட்டம், சத்தியமங்கலம் அடுத்த பவானிசாகர் அணையின் நீர்வரத்து அதிகரித்து வேகமாக நிரம்பி வருகிறது. தற்போது செந்நிறத்தில் அணையில் நீர் நிறைந்து அலை அலையாக வரும் தண்ணீரைக் காண ஆயிரக்கணக்கான சுற்றுலா பயணிகள் அணைக்கு வந்து செல்கின்றனர்.
ஈரோடு, கோவை மாவட்ட மக்களின் முக்கிய நீராதாரமாக உள்ள பவானிசாகர் அணை நிரம்பும் நிலையில் உள்ளது. 105 அடி கொள்ளளவு கொண்டுள்ள அணையின் நீர்மட்டம் 91 அடியை எட்டியுள்ளது. மாயாற்றிலும், பவானி ஆற்றிலும் கரைபுரண்டோடிய வெள்ளநீர் அணைக்கு வந்து சேர்ந்ததால், அணைநீர் செந்நிறத்தில் காணப்படுகிறது.
அணை நீர் வெளியேறும் மதகுகள் முன் உள்ள ஆற்றுப்பாலத்தில் நின்று பொதுமக்கள் குடும்பத்துடன் செல்ஃபி, புகைப்படம் எடுப்பதில் ஆர்வம் காட்டுகின்றனர். அணை நீர்த்தேக்கப் பகுதியை காண செல்லும் பார்வையாளர்கள் அணை நிர்வாகத்திடம் முன்அனுமதி பெற்ற பின் அனுமதிக்கப்படுகின்றனர்.
