ஈரோடு மாவட்டத்தில் கரோனா தாக்கம் அதிகரித்து காணப்படுகிறது. இதையடுத்து மாவட்ட நிர்வாகம் சார்பில் பல்வேறு தடுப்பு நடவடிக்கைகள் எடுக்கப்பட்டு வருகின்றன. தடுப்பூசி போடும் பணியும் தீவிரப்படுத்தப்பட்டுள்ளது.
இந்நிலையில், மாவட்டத்தில் கோவேக்சின், கோவிஷீல்டு தடுப்பூசிகள் முதலில் 100 மையங்களிலும், தனியார் மருத்துவமனைகளிலும் போடப்பட்டு வந்தன. இந்தநிலையில் தடுப்பூசி தட்டுப்பாடு ஏற்பட்டது. கடந்த ஒன்றரை மாதத்திற்கு முன்பு தனியார் மருத்துவமனைகளில் தடுப்பூசி போடும் பணி நிறுத்தப்பட்டது.
66 அரசு ஆரம்ப சுகாதார நிலையங்களில் மட்டும் கரோனா தடுப்பூசி போடப்பட்டு வந்தது. இதுவரை 2 லட்சத்து 72 ஆயிரம் பேர் தடுப்பூசி செலுத்திக் கொண்டுள்ளனர். கடந்த 7 ஆம் தேதி முதல் 13 ஆம் தேதி வரை தடுப்பூசி கையிருப்பு இல்லாததால் ஏழு நாள்களுக்கு மாவட்டத்தில் தடுப்பூசி போடும் பணி நிறுத்தி வைக்கப்பட்டிருந்தது. 13,400 கோவிஷீல்டு தடுப்பூசி வந்ததையடுத்து கடந்த 13, 14 ஆம் தேதியிலிருந்து மீண்டும் தடுப்பூசி போடும் பணி தொடங்கியது.
மேலும் இன்று காலை 15 ஆயிரத்து 600 கோவிஷீல்டு, 4 ஆயிரம் கோவேக்சின் என மொத்தம் 19 ஆயிரத்து 600 தடுப்பூசிகள் வந்தன. ஈரோடு மாநகர் பகுதியில் உள்ள 10 ஆரம்ப சுகாதார மையங்களில் இன்று தடுப்பூசி போடப்படவில்லை. இதுதொடர்பான அறிவிப்பு பலகையும் வைக்கப்பட்டுள்ளது. நாளை (ஜூன் 17) முதல் வழக்கம்போல் தடுப்பூசி போடப்படும் என்று அலுவலர்கள் தெரிவித்தனர்.
தடுப்பூசி போடும் மையங்களில் மக்கள் அதிகாலை முதலே நீண்ட நேரம் வரிசையில் காத்திருந்து ஆர்வத்துடன் தடுப்பூசி போட்டுச் செல்கின்றனர்.
இதையும் படிங்க: சுஷில் ஹரி பள்ளியின் அங்கீகாரத்தை ரத்து செய்ய பரிந்துரை
