தமிழ்நாடு 38 தொகுதிகளுக்கான மக்களவைத் தேர்தல் மற்றும் 18 தொகுதிகளுக்கான இடைத்தேர்தல் ஒரே கட்டமாக நாளை நடைபெறவுள்ள நிலையில், வாக்குசாவடிகளுக்கு வாக்குப்பதிவு இயந்திரங்கள் கொண்டு செல்லப்பட்டு பொருத்தும் பணி நடைபெறுகிறது. இந்நிலையில், திண்டுக்கல் மாவட்டம் கொடைக்கானலில் சிஆர்பிஎஃப் மற்றும் போலீஸார் பாதுகாப்பு பணியில் ஈடுபட்டுள்ளனர். மேலும், கொடைக்கானல் பகுதிகளில் அமைந்துள்ள வாக்குசாவடிகளுக்கு மின்னனு வாக்குபதிவு இயந்திரங்கள் எடுத்து செல்லப்படும் பணிகள் நடைபெற்று வருகிறது.
இதற்காக கொடைக்கானல் அருகே சுமார் 25கிமீ தொலைவில் அமைந்துள்ள சாலை வசதியில்லாத மலைகிராமமான வெள்ளகெவி மலை கிராமம், வட்டக்கானல், டால்பின்நோஸ் பகுதி வழியே குதிரைகள் மூலம் மின்னனு வாக்கு இயந்திரங்கள் கொண்டு செல்லப்பட்டன. வனப்பகுதியாக இருப்பதால் பாதுகாப்பு பணிக்காக துப்பாக்கி ஏந்திய நக்சல் தடுப்பு பிரிவு போலீசார் மற்றும் தேர்தல் நடத்தும் அதிகாரிகள் உள்ளிட்ட பலர் உடன் சென்றனர்.
