திண்டுக்கல்: சின்னாளபட்டியில் சாயக்கழிவு சுத்திகரிப்பு நிலையம், சாயப்பட்டறைகள் அமைப்பதற்கான இடங்களைத் தேர்வு செய்வதற்காக அமைச்சர் பெரியசாமி நேற்று (ஜூலை.18) ஆய்வு மேற்கொண்டார்.
அதனையடுத்து செய்தியாளர்களிடம் பேசிய அமைச்சர், "சின்னாளபட்டியில் குடிசைத் தொழிலாக தயாரிக்கப்படும் சுங்குடி சேலைகள் மிகவும் சிறப்பு பெற்றவை. இந்தியாவில் பல்வேறு மாநிலங்களுக்கு அவை அனுப்பி வைக்கப்படுகின்றன.
திட்டம் கிடப்பில் போடப்பட்டது
சின்னாளபட்டி, அதன் சுற்றுவட்டாரப் பகுதிகளில் சுங்குடி சேலை மற்றும் சாயத் தொழிலில் நேர்முகமாகவும், மறைமுகமாகவும், ஏராளமான தொழிலாளர்கள் உள்ளனர். கடந்த மூன்று ஆண்டுகளுக்கு முன்னர் சட்டப்பேரவையில் நான் பேசியபோது தொகுதி மேம்பாட்டு நிதியிலிருந்து சாயக்கழிவு சுத்திகரிப்பு நிலையம் அமைக்க வேண்டும் என்று கோரிக்கை விடுத்தேன். ஆனால் அது கிடப்பில் போடப்பட்டது.
நிரந்தர தீர்வு காண கோரிக்கை
சாயத்தொழிலாளர் பிரச்னைக்கு நிரந்தரத் தீர்வு காண வேண்டும் என முதலமைச்சர் ஸ்டாலினிடம் தொழிலாளர்கள் கோரிக்கை விடுத்திருந்தனர். இதையடுத்து மாவட்ட ஆட்சியர், சுற்றுச்சூழல் துறை அலுவலர்களுடன் ஆய்வு மேற்கொள்ளப்பட்டு இடம் தேர்வு செய்யப்பட்டுள்ளது.
அயராது உழைக்கும் முதலமைச்சர்
முதலமைச்சர் ஸ்டாலின் கரோனா தொற்றைக் கட்டுப்படுத்த அயராது உழைத்து வருகிறார். இதுவரை 1.60 கோடி மக்களுக்கு தடுப்பூசி செலுத்தப்பட்டுள்ளது. தற்போது தினமும் ஒரு லட்சம் டோஸ் தடுப்பூசிகள் செலுத்தப்படுகின்றன. அவருடைய நடவடிக்கைகளால் கரோனா பரவல் கட்டுக்குள் வந்துள்ளது" என்றார்.
தொங்கு மின் வேலிகள்
மேலும் செய்தியாளர்கள் கேட்ட கேள்விக்கு பதிலளித்த அமைச்சர், "யானைகள் ஊருக்குள் புகுந்து விவசாயிகள் சாகுபடி செய்த பயிர்களை சேதப்படுத்தி வருவதைக் கேட்டேன். இதைத் தடுக்க தொங்கு மின் வேலிகள் அமைக்கவும் ஆலோசிக்கப்பட்டு வருகிறது.
வனத்துறை அமைச்சருடன் ஆலோசித்து தீர்வு காணப்படும். விளைபயிர்களையும், விவசாயிகளையும் பாதுகாக்க நடவடிக்கை மேற்கொள்ளப்படும்" எனவும் தெரிவித்தார்.
இந்நிகழ்ச்சியில், மாவட்ட வருவாய் அலுவலர் கோவிந்தராசு, திண்டுக்கல் வருவாய் கோட்டாட்சியர் காசிசெல்வி, மாசுக்கட்டுப்பாட்டு வாரிய கோட்டப் பொறியாளர் சந்திரசேகரன் உள்பட துறை சார்ந்த அலுவலர்கள் கலந்து கொண்டனர்.
இதையும் படிங்க: மாநிலங்களிடம் 2.60 கோடி தடுப்பூசிகள் - சுகாதாரத்துறை அமைச்சகம் தகவல்
