திண்டுக்கல் மாவட்டம் சின்னாளப்பட்டி, மேட்டுப்பட்டி, மேலக்கோட்டை, கீழக்கோட்டை, பட்டிவீரன்பட்டி, காந்திபுரம் உள்ளிட்ட பல்வேறு பகுதிகளில் சலவை தொழிலை வாழ்வதாரமாக கொண்ட நூற்றுக்கும் மேற்பட்ட குடும்பத்தினர் வசித்துவருகின்றனர். ஏழ்மையில் வாழ்ந்துவரும் குறித்த சலவைத் தொழிலாளர் சமுதாய மக்களுக்கு தமிழ்நாடு அரசு புதிய திட்டத்தின் கீழ் வழங்கக்கூடிய இலவச வீட்டு மனை பட்டாவை உடனடியாக வழங்க வேண்டும் என மாவட்ட ஆட்சியரிடம் கோரிக்கை மனு ஒன்றை அளித்தனர்.
மேலும், தங்களின் வாழ்வதாரமாக விளங்கி வரும் சலவைத் துறையை சீரமைத்து தருமாறும் குறித்த மனுவில் வேண்டுகோள் விடுத்துள்ளார். இது குறித்து சலவைத் தொழிலாளர்கள் கூறுகையில்,“தமிழ்நாடு அரசின் இலவச வீட்டுமனை பட்டா திட்டத்தின் கீழ் எங்களுக்கு இலவச வீட்டு மனை பட்டா வழங்க நடவடிக்கை எடுக்க கோரியும் , நூற்றுக்கும் மேற்பட்ட குடும்பங்களின் வாழ்வாதாரமாக இருக்கும் பண்ணைக்காடு காமராஜபுர வண்ணர் சலவை துறையை சீரமைத்து தரக்கோரியும், மாவட்ட ஆட்சியரிடம் சலவைத் தொழிலாளர்கள் சார்பில் மனு அளித்துள்ளோம்” என்றனர்.
கடந்த 2018-2019 ஆம் ஆண்டிற்கான நிதிநிலை அறிக்கையில் புறம்போக்கு நிலங்களில் வசிக்கும் ஏழை மக்களுக்கு நிரந்தரமாக வீடு வழங்க வேண்டும் என்பதற்காகவும், அரசு நிலங்களை ஆக்கிரமிப்புகளில் இருந்து மீட்டெடுத்து உரிய செயல்பாட்டிற்கு உட்படுத்தும் வகையிலும், சம்பந்தப்பட்ட கிராமங்களில் வருவாய்த்துறையின் மூலம் நிலங்களை கையகப்படுத்தி ஏழை குடும்பங்களுக்கு வீட்டு மனை பட்டா இலவசமாக வழங்கக்கூடிய புதிய திட்டத்தை அரசு செயல்படுத்தும் என்று தமிழ்நாடு அரசின் அரசாணை வெளியிட்டிருந்ததும் இங்கு குறிப்பிடத்தக்கது.
இதையும் படிங்க : தனியார் பால் பாக்கெட் விலை நாளைமுதல் கடும் உயர்வு!
