யானை அட்டகாசத்தால் மின்வேலி அமைக்க மக்கள் கோரிக்கை!

திண்டுக்கல்: கொடைக்கானல் மலை கிராமங்களில் யானைகள் கூட்டமாக வந்து அட்டகாசம் செய்து வருவதால், அப்பகுதியில் மின்வேலி அமைக்கக் கோரி விவசாயிகள், கோரிக்கை விடுத்துள்ளனர்.

திண்டுக்கல் மாவட்டம் கொடைக்கானலில் கடந்த சில மாதங்களாக மலைக்கிராமங்களில் யானைகளின் படையெடுப்பு அதிகமாகக் காணப்படுகிறது.

கடந்த இரண்டு நாட்களாகவே யானைக் கூட்டம் தாண்டிக்குடி, பேத்துப்பாறை, பாரதி அண்ணாநகர், அஞ்சுவீடு, புலியூர், ஆகிய கிராமப் பகுதிகளில் நள்ளிரவில் நுழைந்து விவசாயிகள் அங்கு பயிரிட்ட அவரை, செள செள போன்ற காய்கறிகளை சேதப்படுத்தியுள்ளன.

இதனைக் கண்ட விவசாயிகள் யானைகளை விரட்ட முடியாததால் பரபரப்பு ஏற்பட்டது. தொடரும் யானை அட்டகாசத்தால் விவசாயிகள் இரவு தூங்க முடியாமல் அச்சத்தில் இருந்து வருகின்றனர்.

இதனால் யானைகள் சேதப்படுத்திச் செல்லும் விளை நிலங்கள் மற்றும் குடியிருப்பு பகுதிக்குள், யானைகள் கூட்டம் வராமல் இருக்க மின்வேலிகள் அமைக்க வேண்டுமென கிராம பொது மக்கள் தமிழ்நாடு அரசுக்கு கோரிக்கை விடுத்துள்ளனர்.

மேலும் படிக்க: 3 மாத குட்டி யானையை, யானைக் கூட்டத்துடன் சேர்க்க நடவடிக்கை

மேலும் பார்க்க: யானை-மனித மோதலைத் தடுக்கும் கருவி!