தங்கம், வெள்ளி ஆபரணங்களின் விலைஉயர்வைப் போல வெங்காய விலை நாடு முழுவதும் பல்வேறு காரணங்களால் நாட்டு மக்களுக்கு விலை உயர்வு என்ற கொடுஞ்சுமையை தூக்கிக் கொடுத்திருக்கிறது. இன்றைய நிலவரப்படி, ஆந்திர மாநிலத்தில் அதிகபட்டசமாக நூறு கிலோ (ஒரு குவிண்டால்) வெங்காயம், 13 ஆயிரத்து 160 ரூபாய்க்கு விற்பனையாகியுள்ளது.
இப்படி வெங்காயம் விண்ணைத் தொடும் உச்ச விலையை எட்டியிருக்க, பொதுமக்களை வாட்டி வதைப்பதோடு, விவசாயிகளின் நிலையையோ கேள்விக்குறியாக்கியுள்ளது.
தமிழ்நாட்டில் திண்டுக்கல் மாவட்டம் வேடசந்தூர் சுற்றுவட்டாரப்பகுதிகளில் சுமார் 500க்கும் மேற்பட்ட ஏக்கரில் பயிரிடப்பட்டிருந்த வெங்காயம் திடீர் நோய்த் தாக்குதலால் பாழாகி வருகிறது. வெங்காயம் அழுகி விவசாயிகளை வேதனை அடையச் செய்துள்ளது.
திண்டுக்கல் மாவட்டம் வேடசந்தூர் அருகே குஜிலியம்பாறை உட்பட்டு தோப்புப்பட்டி என்ற பகுதியில் சுமார் 500 ஏக்கருக்கும் மேலாக வெங்காயம் பயிரிடப்பட்டுள்ளது. இப்பகுதியில் கடந்த இரண்டு நாட்களாக சுருள் நோய் மற்றும் கால் பிறப்பு என்ற நோய் தாக்கப்பட்டு அறுவடைக்கு 20 நாட்கள் இருக்கும் நிலையில் திடீரென அழுகி வீணாகி வருவதாக விவசாயிகள் கவலை தெரிவிக்கின்றனர்.
வெங்காயப் பயிர்கள் காலை வேளையில் ஒரு விதமாகவும், மதிய நேரங்களில் அழுகும் நிலையிலும் இருப்பதாக விவசாயிகள் கூறுகின்றனர். தோப்புபட்டி சுற்றுவட்டாரப்பகுதிகளில் 500 ஏக்கருக்கும் மேலாக வெங்காயப்பயிர்கள் அழுகிய நிலையில் வீணாகியுள்ளதால், லட்சக்கணக்கான ரூபாய் நஷ்டம் ஏற்பட்டுள்ளதாக விவசாயிகள் வேதனை தெரிவிக்கின்றனர். இதற்கு உரிய இழப்பீடும், விவசாயத்திற்கான காப்பீடும் வழங்கவேண்டும் என தமிழ்நாடு அரசுக்கு விவசாயிகள் கோரிக்கை விடுத்துள்ளனர்.
பாதிக்கப்பட்ட நிலங்களை மாவட்ட நிர்வாகம் மற்றும் வேளாண்மைத்துறையினர் ஆய்வு செய்து உரிய இழப்பீடு வழங்க நடிவடிக்கை எடுக்க வேண்டும் என விவசாயிகள் கோரிக்கை விடுத்தவண்ணம் உள்ளனர். ஆனால் தோட்டக்கலைத்துறை அலுவலர்களிடம் இதுகுறித்து தகவல் தெரிவித்தும் கூட ஆய்வு செய்ய வராமல் அலட்சியம் காட்டி வருவதாகக் குற்றச்சாட்டு எழுந்துள்ளது.
