விழுப்புரம் மாவட்டம் சித்தேரிக்கரை பகுதியைச் சேர்ந்த நகை தொழிலாளி அருண் என்பவர் லாட்டரி சீட்டு மோகத்தால் தனது மொத்த சொத்துக்களையும் இழந்து, குடும்பத்துடன் தற்கொலை செய்துகொண்டார். தனது மூன்று மகள்களுக்கும் விஷம் கொடுத்துக் கொலை செய்த பின்னர், அருணும் அவரது மனைவியும் தற்கொலை செய்துகொண்டனர். இந்த சம்பவம் மாநிலம் முழுவதும் பெரும் அதிர்வலையை ஏற்படுத்தியது.
தற்கொலை செய்துகொள்ளும் முன்பு லாட்டரி விற்பனையை முழுவதுமாக ஒழித்துவிடுங்கள் என கோரிக்கை விடுத்து வீடியோ ஒன்றையும் அவர் தனது செல்ஃபோனில் பதிவு செய்திருந்தார்.
இந்த நிலையில், காவல் துறையினர் லாட்டரி சீட்டுகளை விற்பனை செய்பவர்கள் மீது நடவடிக்கை எடுத்து வருகின்றனர். மேலும் விழுப்புரம் மாவட்டத்தில் 14 பேர் கைது செய்யப்பட்டுள்ளனர்.
இதனிடையே, கடலூர் மாவட்டத்தில் முதுநகர் பகுதியைச் சேர்ந்த ஜவகர், சிதம்பரத்தைச் சேர்ந்த அழகேசன், அண்ணாமலை நகர் பகுதியைச் சேர்ந்த குமரேசன், கீரப்பாளையத்தைச் சேர்ந்த ஷாஜகான், கார்த்திக், மகாதேவன், அம்மாபேட்டை பகுதியைச் சேர்ந்த ரா.சுந்தரவடிவேல் உள்ளிட்ட 13 பேரை காவல் துறையினர் அதிரடியாகக் கைது செய்தனர்.
மேலும் லாட்டரி சீட்டு விற்பனை தொடர்பாக பொதுமக்கள் 90873 00100 என்ற எண்ணிற்கு வாட்ஸ்அப் மூலம் தகவல் தெரிவிக்கலாம் எனவும் மாவட்ட காவல் கண்காணிப்பாளர் ஸ்ரீ அபிநவ் தெரிவித்துள்ளார்.
