நாடு முழுவதும் வெங்காய தட்டுப்பாடு நிலவி வரும் நிலையில் வெங்காயத்தின் விலை உச்சத்தை தொட்டது. இதனால் சாமானிய மக்கள் வெங்காயத்தை பயன்படுத்த முடியாத நிலை ஏற்பட்டது. தற்போது வெங்காயத்தை இரண்டு டன்னுக்கும் மேல் பதுக்கி வைத்திருந்தால், ஏழு ஆண்டு சிறை என அரசு அறிவித்த நிலையில் பதுக்கி வைத்த வெங்காயம் முழுவதும் வெளியில் சந்தைக்கு வந்துள்ளதாக வியாபாரிகள் தெரிவித்தனர்.
நேற்றைய தினம் பெங்களூர் சந்தைக்கு வெங்காயம் வந்ததால் விலை வீழ்ச்சி அடைந்துள்ளது, இதனால், கடலூர் வியாபாரிகள் பெங்களூரிலிருந்து குறைவான விலைக்கு பல டன் வெங்காயத்தை கொள்முதல் செய்து வந்தனர். நேற்று கிலோ 25 ரூபாய்க்கு விற்கப்பட்ட வெங்காயம் இன்று காலை கடலூர் உழவர் சந்தையில் 20 ரூபாய்க்கு விற்கப்பட்டது. இதை ஏராளமானோர் முண்டியடித்துக் கொண்டு வெங்காயத்தை வாங்கினர்.
மேலும் கடலூரில் வெங்காயத்தை நான்கு வகையாகப் பிரிக்கப்பட்டு மூன்று வகையான வெங்காயத்தை கிலோ 20 ரூபாய்க்கும், பல்லாரி வெங்காயம் கிலோ 60 ரூபாய்க்கும் விற்பனை செய்து வருகின்றனர். 200 ரூபாய்க்கு வெங்காயம் வாங்கி பயன்படுத்த முடியாத நிலையில் சிக்கித்தவித்த சாமானிய மக்களுக்கு தற்போது கிலோ 20 ரூபாய்க்கு விற்கப்படுவது வரப்பிரசாதமாக உள்ளது என இல்லத்தரசிகள் தெரிவித்தனர்.
இதையும் படிக்க: வெங்காயம் பதுக்கலை தடுக்க சந்தைகளில் அலுவலர்கள் சோதனை!
