கடலூர் மாவட்டம் சிதம்பரத்தில் இருந்து தருமபுரி நோக்கி அரசு பேருந்து 50க்கும் மேற்பட்ட பயணிகளுடன் சென்றது. வேப்பூர் அருகே அடரி என்ற கிராமத்தில் கடலூர் - சேலம் சாலை வந்தபோது ஓட்டுநரின் கட்டுப்பாட்டை இழந்து பேருந்து தாறுமாறாக ஓடி அப்பகுதியில் இருந்த புளியமரத்தின் மீது மோதி விபத்துக்குள்ளானது. அதில் பேருந்தின் முன்பக்கம் பலத்த சேதமடைந்தது.
பேருந்தில் பயணம் செய்த கோவிந்தராஜ் (55) என்னும் பயணி சம்பவ இடத்திலேயே உயிரிழந்தார். மேலும் 20 பேர் படுகாயமடைந்தனர்.
இச்சம்பவம் குறித்து சிறுபாக்கம் காவல் நிலையத்திற்கு தகவல் அளித்ததின் பேரில் விரைந்து வந்த காவல் துறையினர் விபத்தில் படுகாயமடைந்த 20 பயணிகளையும் 108 ஆம்புலன்ஸ் மூலம் பெரம்பலூர் அரசு மருத்துவமனைக்கு அனுப்பி வைத்தனர். இதையடுத்து புளியமரத்தில் மோதிய அரசு பேருந்தை கிரேன் மூலம் தீயணைப்புத் துறையினர் மற்றும் காவல் துறையினர் அப்புறப்படுத்தினர்.
இதையும் படியுங்க: நேபாளத்தில் பேருந்து விபத்தில் 14 பேர் உயிரிழப்பு - பலர் காயம்!
