கோயம்புத்தூர்: ஆதிக் ரவிச்சந்திரன் இயக்கத்தில் உருவான “மார்க் ஆண்டனி” படத்தில் திருநங்கை சமூக மக்களை அவமதிக்கும் விதமாக சில காட்சிகள் இடம் பெற்றிருப்பதாக கோவையை சேர்ந்த திருநங்கை மாநகர காவல் ஆணையாளர் அலுவலகத்தில் புகார் அளிக்கப்பட்டு உள்ளது.
சமீபத்தில் ஆதிக் ரவிச்சந்திரன் இயக்கத்தில் நடிகர்கள் விஷால் மற்றும் எஸ்ஜே சூர்யா ஆகியோர் நடிப்பில் வெளியான திரைப்படம் மார்க் ஆண்டனி. இப்படம் டைம் டிராவல் பின்னணியில் உருவாக்கப்பட்ட ஆக்ஷன் கலந்த படமாகும். இப்படத்தில் கதாநாயகனுக்கு கடந்த காலத்துடன் பேசும் ஃபோன் ஒன்று கிடைக்கிறது.
அதன் மூலம் கடந்த காலத்துக்கு போன் செய்து, தங்கள் வாழ்வில் மாற்றங்கள் செய்வது போல கதைக்களம் உருவாக்கப்பட்டு உள்ளது. இந்நிலையில் திருநங்கைகளை அவமதிக்கும் விதமாக சில காட்சிகள் இப்படத்தில் வைக்கப்பட்டு இருப்பதாக கோவையை சேர்ந்த திருநங்கை ஜாஸ்மின் மதியழகன் என்பவர் மாநகர காவல் ஆணையாளர் அலுவலகத்தில் புகார் அளித்து உள்ளார்.
இப்படிப்பட்ட காட்சிகள் திருநங்கைகளை கேளிக்கை பொருளாகவும், அவமானப்படுத்துவதாக இருப்பதாகவும், இது போன்ற திரைப்படங்களினால் தான் திருநங்கைகளின் முன்னேற்றம் 10 ஆண்டுகள் பின்னோக்கி தள்ளப்பட்டு உள்ளதாகவும் அவர் புகாரில் தெரிவித்து உள்ளார்.
எனவே மார்க் ஆண்டனி திரைப்படத்தை தடை செய்ய வேண்டும் அல்லது குறிப்பிட்ட காட்சிகளை நீக்க வேண்டும் என அவர் புகார் மனுவில் தெரிவித்து உள்ளார். இயக்குநர் மீது தக்க நடவடிக்கை எடுக்க வேண்டும் எனக் கோரி கோவை மாநகர காவல் ஆணையாளர் அலுவலகத்தில் அவர் புகார் மனு அளித்துள்ளார்.
இது குறித்து அவர் கூறுகையில், "மார்க் ஆண்டனி திரைப்படத்தில் திருநங்கைகள் பாலியல் உறவுக்காக அலைவது போல் காட்சிப்படுத்தப்பட்டுள்ளார்கள். ஒய்.ஜி மகேந்திரனையும் திருநங்கை போல் காட்டி எவ்வித Positive நிகழ்வையும் காட்டாமல் விட்டுவிட்டனர். மேலும் சில இடங்களில் ஆண்கள், திருநங்கைகள் போல் வேடமிட்டு விஷாலை கொலை செய்வதற்கு வருவது போன்ற காட்சிகளும் இடம் பெற்றுள்ளது.
தற்போது வரை திருநங்கைகளை கொச்சைப்படுத்தும் காட்சிகள் திரைப்படங்களில் இருந்து தான் வந்துள்ளது. பலரும் படத்தை படமாக பாருங்கள் என கூறுகிறார்கள். எங்களுக்கு கிடைக்க வேண்டிய அனைத்து சலுகைகள் மற்றும் உரிமைகளை வழங்கிவிட்டு இதனை கூறுங்கள்” என்று அவர் தெரிவித்தார்.
இதையும் படிங்க: நாயகன் மீண்டும் வரார்... கமலின் நாயகன் படம் மறு வெளியீடு தேதி அறிவிப்பு!
