கோவை மாவட்டம் கருமத்தம்பட்டி அருகே உள்ள கே.ராயர்பாளையம் பகுதியைச் சேர்ந்த பழனிச்சாமி என்பவரின் மகன் விக்னேஸ்வரன். இவரது நண்பர்கள் பரமேஸ்வரன், புவனேஸ்வரன், மாதவன் ஆகியோர் அதே பகுதியில் விசைத்தறி தொழில் செய்து வருகின்றனர்.
மேலும் ரேக்ளா ரேஸ் ஓட்டுவதும், காளைகளை தயார் செய்வதும் இவர்களுடைய பொழுதுபோக்கு என கூறப்படுகிறது. இவர்கள் கருமத்தம்பட்டி அருகே வடுகபாளையம் பகுதியில் உள்ள குட்டையில் ரேக்ளா காளைக்கு கடந்த சில தினங்களாக பயிற்சி அளித்து வருகின்றனர்.
இந்நிலையில், நேற்று நான்கு பேரும் காளையுடன் குட்டையில் குளிக்கச் சென்றபோது, திடீரென விக்னேஸ்வரன் ஆழமான பகுதிக்கு சென்று நீரில் மூழ்கியபடி தன்னை காப்பாற்றும்படி கையை மேலே தூக்கியுள்ளார்.
இதை கண்ட, நண்பர்கள் விக்னேஸ்வரனை காப்பாற்ற போராடினார். ஆனால் முடியாததால், அக்கம் பக்கத்தினர் உதவியுடன் போராடியும் காப்பாற்ற முடியவில்லை. பின்னர் இது குறித்து தீயணைப்பு துறையினருக்கு தகவல் தெரிவித்து சம்பவ இடத்திற்கு விரைந்து வந்த தீயணைப்பு வீரர்கள், குட்டையில் இறங்கி சில மணி நேர தேடுதலுக்கு பின் விக்னேஸ்வரனை சடலமாக மீட்டனர்.
மேலும் இதுகுறித்து தகவலறிந்து வந்த கருமத்தம்பட்டி காவல்துறையினர் சடலத்தை கைப்பற்றி உடற்கூறாய்விற்காக கோவை அரசு மருத்துவமனைக்கு அனுப்பி வைத்தனர்.
இச்சம்பவம் தொடர்பாக வழக்குப்பதிவு செய்து விசாரணை மேற்கொண்டு வருகின்றனர். விக்னேஸ்வரன் இறப்பதற்கு முன்னதாக தண்ணீரில் காளையுடன் டிக் டாக் வீடியோ எடுத்து தனது செல்ஃபோனில் பதிவு செய்துள்ளார். அந்த காட்சி அவரது நண்பர்களிடையே பகிரப்பட்டு வருகிறது. இளைஞர் தண்ணீரில் முழ்கி உயிரிழந்த சம்பவம் அப்பகுதியில் சோகத்தை ஏற்படுத்தியுள்ளது.
இதையும் படிங்க:
