கோயம்புத்தூர் குனியமுத்தூர் பகுதியில் முன்னாள் அமைச்சர் எஸ்.பி. வேலுமணி அதிமுக சார்பில் நீர் மோர் பந்தலை திறந்து வைத்து பொதுமக்களுக்கு நீர் மோர், பழங்கள் ஆகியவற்றை வழங்கினார். பின்னர், அவர் செய்தியாளர்களைச் சந்தித்துப் பேசினார். அப்போது அவர் கூறுகையில், “சட்டமேதை அம்பேத்கர் புகைப்படத்துக்கு அஞ்சலி செலுத்தப்பட்டது. எடப்பாடியார் உத்தரவுக்கு இணங்க பல்வேறு இடங்களில் நீர் மோர் பந்தல் திறக்கப்பட்டுள்ளது.
திமுக ஆட்சியில் கடந்த இரண்டு ஆண்டுகளில் எந்த வேலைகளும் நடைபெறவில்லை. அத்திக்கடவு - அவிநாசி திட்டம், பாலங்கள், சாலைகள் போன்ற திட்டங்கள் அனைத்தும் மெதுவாக நடைபெறுகிறது. புதியதாக எந்த திட்டமும் கொண்டு வரவில்லை. கோவை மாவட்டத்தைப் புறக்கணிக்காமல் திட்டங்களை செயல்படுத்த வேண்டும். திமுக ஆட்சியில் எங்கு பார்த்தாலும் ஊழல் தான் நடைபெறுகிறது. இதை நாங்கள் சொல்லித் தெரிய வேண்டியது இல்லை.
கோவையில் ஒரு லோடு மண் எடுப்பதற்கு 3 ஆயிரம் முதல் 5 ஆயிரம் ரூபாய் வரை லஞ்சமாக வாங்குகின்றனர். மாநகராட்சி, தாலுகா அலுவலகம் உட்பட அனைத்து அலுவலகங்களிலும் லஞ்சம் இருக்கிறது. கடுமையாக ஊழல் பரவி இருக்கிறது.
திமுக எல்லா இடங்களிலும் கொள்ளை அடித்துக் கொண்டிருக்கிறது. கரோனா காலத்தில் எல்லா இடங்களிலும் மருந்தடிக்கப்பட்டது. கரோனா கட்டுப்படுத்துவது குறித்து கூட்டம் நடத்தப்பட்டது. ஆனால், இப்பொழுது அலுவல் ரீதியாக கூட்டங்கள் எதுவும் நடத்தப்படவில்லை.
சட்டப்பேரவையில் எதிர்க்கட்சித் தலைவர் மக்களுக்காகப் பல்வேறு பிரச்னைகளை கொண்டு வருகிறார்கள். அவை எல்லாம் வெளியில் தெரிவதில்லை. திமுகவை ஊடகங்கள் தூக்கிப் பிடிக்கின்றன. ஊடகங்கள் கைவிட்டு விட்டால் திமுக விழுந்து விடும்” என்றார்.
மேலும், “ஐபிஎல் போட்டிகளை பொறுத்தவரை கிரிக்கெட் போர்டில் சட்டப்பேரவையில் உறுப்பினர்களுக்கு 300, 400 டிக்கெட் கொடுக்கப்பட்டிருப்பதாக கேள்விப்பட்டோம். அந்த நேரத்தில் இந்த கேள்வியை கேட்டால் சரியாக இருக்கும் என்பதால் அந்தக் கேள்வி கேட்கப்பட்டது.
அனைத்து சட்டப்பேரவை உறுப்பினர்களுக்காகவே கேட்கப்பட்டது. அதற்கு விளையாட்டுத்துறையில் இருந்து பதில் சொல்லிவிட்டார்கள். அதற்கு பின்பு சட்டப்பேரவை உறுப்பினர்கள் நிறைய பேருக்கு வாய்ப்பு வந்து, அவர்கள் போய் மேட்ச் பார்த்திருக்கிறார்கள்” எனத் தெரிவித்தார்.
இதையும் படிங்க: ஈபிஎஸ் பெயரை உச்சரிக்க மறுக்கும் சசிகலா..! அதிமுகவை ஒன்றிணைப்பாரா..?
