கோவை மாங்கரை வனப்பகுதியில் யானைகள் உள்ள யானைகள் தண்ணீர், உணவு தேடி அருகில் உள்ள சின்னதடாகம், பெரியதடாகம், வீரபாண்டி ஆகிய பகுதிகளில் உள்ள செங்கல் சூளைகள்,விவசாய நிலங்களுக்கு வருவது வழக்கம்.
இந்நிலையில் வீரபாண்டி வால்குட்டை மலையடிவாரத்தில் செங்கல் சூளைக்கு மண் எடுக்கும் இடத்தில் 18 வயது மதிக்கதக்க பெண் யானை ஒரே இடத்தில் நகராமல் சோர்வுடன் காணப்பட்டது. இதைக் கண்ட அப்பகுதி மக்கள் வனத்துறையினருக்கு தகவல் தெரிவித்தனர். கோவை மண்டலத்தில் வனத்துறை மருத்துவர்கள் யாரும் இல்லாததால் யானைக்கு உடனடியாக சிகிச்சை அளிக்க வனத் துறையினரால் முடியவில்லை. இரண்டு நாட்களாகியும் சிகிச்சை அளிக்காததால் யானை திடீரென மயங்கி விழுந்தது. இதனையடுத்து சத்தியமங்கலம் புலிகள் காப்பக வனத்துறை மருத்துவருக்கு தகவல் அளிக்கப்பட்டு, அங்கு வந்த மருத்துவர் யானையை பரிசோதனை செய்தார். அதில் யானை உயிரிழந்தது தெரியவந்தது.
தொடர்ந்து யானையின் உடல் இன்று காலை உடற்கூறாய்வு செய்யப்பட்டது. இது குறித்து விலங்கு நல ஆர்வலர்கள் கூறுகையில், தமிழ்நாட்டில் முக்கிய பகுதியாக உள்ள கோவை மண்டலத்தில் வனத் துறை மருத்துவர்கள் நியமனம் செய்யப்படவில்லை எனவும், இதே போன்று நீலகிரி மாவட்டத்தில் வனத் துறை மருத்துவர்கள் இல்லாததால் பல்வேறு வனவிலங்குகள் உடல்நலம் பாதிக்கப்பட்டு உயிரிழப்பதாகவும் வேதனை தெரிவித்தனர். எனவே உடனடியாக அரசு காலியாக உள்ள வனத் துறை மருத்துவ பணியிடங்களை உடனடியாக நிரப்ப வேண்டும் எனவும் கோரிக்கை வைத்தனர். மேலும், ஒரே இடத்தில் 3 நாட்கள் நகர முடியாமல் யானை உயிரிழந்த சம்பவம் அப்பகுதி மக்களிடையே சோகத்தை ஏற்படுத்தியுள்ளது.
