கோவை: மகா சிவராத்திரியை முன்னிட்டு ஈஷா நிறுவனர் சத்குருவுக்கு நரேந்திர மோடி கடிதம் அனுப்பியுள்ளார். அதில், “புனிதமான மகா சிவராத்திரி கொண்டாட்டத்திற்குத் தாங்கள் செய்துவரும் ஏற்பாடுகளை அறிந்து மிகுந்த மகிழ்ச்சியடைகிறேன். மகா சிவராத்திரி விழா அனைவருக்கும் ஒரு உத்வேகத்தை அளிக்கும் ஆதாரமாக உள்ளது.
ஜீவனிலிருந்து சிவனாக மாற வழிகாட்டும் ஆதியோகி
ஆதியோகி எங்கும் நிறைந்திருக்கிறார் என்பதை நினைவுகூருவதற்கு இது சிறந்த சந்தர்ப்பமாகும். நம்முடைய மனம், உடல், புத்தி ஆகியவற்றை ஒருங்கிணைத்து, ஜீவனிலிருந்து சிவனாக மாறுவதற்கு ஆதியோகி நமக்கு வழிகாட்டுகிறார். மக்களின் ஆன்மிக வளர்ச்சிக்காகவும், அவர்களின் வாழ்க்கை மேம்படுவதற்கும் நீங்கள் எடுத்துவரும் அயராத முயற்சிகள் மிகவும் போற்றத்தக்கவை.
சுற்றுச்சூழல் பாதுகாப்பு, கிராமப்புற மேம்பாட்டிற்கான திட்டங்கள், கல்வி, மருத்துவம், சமூக மறுமலர்ச்சி எனப் பன்முகத் திட்டங்களை நீங்கள் முன்னெடுத்துச் செய்துவருகிறீர்கள். உங்களுடைய இந்த முயற்சிகள் அனைத்தும் எண்ணற்ற மக்களின் வாழ்வில் நேர்மறை மாற்றத்தை உருவாக்கும் நோக்கத்தைக் கொண்டுள்ளது.
