கோவை மாவட்டத்தில் சுமார் 30-க்கும் மேற்பட்ட குளங்கள் உள்ளன. 20 முதல் 400 ஏக்கர் வரை பரப்பளவு கொண்ட குளங்களில் மீன்கள் வளர்க்கப்பட்டு ஆண்டுதோறும் ஏலம் விடுவது வழக்கம். அவ்வாறு மீன்பிடிக்க ஒப்பந்தம் எடுக்கும் ஒப்பந்ததாரர்கள் உள்நாட்டு வகை மீன்களை தவிர தடைசெய்யப்பட்ட மீன்களும், வெளிநாட்டு வகை மீன்களும் அதிகளவில் வளர்க்கப்படுகிறது. அதனால், குளத்தின் அடியில் மீன் கழிவுகள் சேர்ந்து நிலத்தடியில் நீர் செல்லாத வகையில் தடுப்பதாக சமூக செயற்பாட்டாளர்கள் தெரிவித்துள்ளனர்.
இது குறித்து கவுசிகா நதி மீட்புக் குழு ஒருங்கிணைப்பாளர் செல்வராஜ் கூறுகையில், "வியாபார நோக்கத்திற்காக வளர்க்கப்படும் மீன்களுக்கு கோழிக் கழிவுகள் போன்றவை உணவாக வழங்கப்படுகிறது. அதிகளவில் மீன்கள் வளர்க்கப்படுவதால் மீன் கழிவுகள் நீரின் அடியில் தேங்கி நீர் நிலத்திற்குள் செல்லாமல் அப்படியே ஆவியாகிறது.
அதையடுத்து, உள்நாட்டு வகை மீன்களைத் தவிர வெளிநாட்டு வகை மீன்கள் வளர்ப்பதால் இந்தப் பிரச்னை ஏற்படுகிறது. மீன் கழிவுகள் அகற்றப்பட்டால் மட்டுமே நிலத்தடி நீர் கீழே இறங்கும்.
குளங்களில் மீன் வளர்ப்பதற்கு தடைசெய்ய வேண்டும் அல்லது குறிப்பிட்ட வகை மீன்கள் மட்டுமே வளர்க்க அனுமதிக்க முறைப்படுத்த வேண்டும். மேலும் மீன்களுக்கு பல்வேறு வகையான உணவுகள் போடப்படுவதாலும் அந்தக் கழிவுகள் மண்ணில் படிந்து நீர் கீழே இறங்காது தடுக்கிறது" என குற்றம்சாட்டினார்.
அது மட்டுமல்லாது கழிவுநீர் குளத்தில் கலக்கப்படுவதாலும், பிரணாவாயு பற்றாக்குறையாலும், நெகிழிக் கழிவுகளாலும் குளத்தில் உள்ள மீன்கள் எல்லாம் இறந்து மிதக்கும் நிலை தற்போது ஏற்பட்டுள்ளது என்று சமூக செயற்பாட்டாளர்கள் வேதனை தெரிவிக்கின்றனர்.
