கோவை மாவட்டம் பொள்ளாச்சி நகராட்சியில் 189 கோடி ரூபாய் செலவில் பாதாள சாக்கடை திட்ட பணிகள் தொடங்கப்பட்டு கடந்த இரண்டு ஆண்டுகளுக்கு மேலாக நடைபெற்றுவருகிறது. இந்த பணிகளுக்காக தார் சாலைகள் பெயர்த்தெடுக்கப்பட்டதால் நகரின் முக்கிய பகுதிகளில் சாலைகள் குண்டும் குழியுமாக காணப்படுகின்றன.
தற்போது பொள்ளாச்சி மற்றும் அதன் சுற்றுவட்டார பகுதிகளில் தொடர்ந்து மழை பெய்து வருவதால் குண்டும் குழியுமாக உள்ள சாலைகளில் தண்ணீர் தேங்கியுள்ளது. இதனால், பள்ளி மாணவர்கள், பொதுமக்கள், வாகன ஓட்டிகள் பல்வேறு சிரமத்திற்குள்ளாகி வருகின்றனர்.
இதுகுறித்து, நகராட்சி அதிகாரிகளிடம் மனு அளித்தும் நடவடிக்கை எடுக்காததால் பொறுமையிழந்த பொதுமக்கள் குண்டும் குழியுமாக உள்ள சாலைகளில் வாழை மரங்களை நட்டு நூதன முறையில் போராட்டத்தில் ஈடுப்பட்டனர்.
தகவலறிந்து சம்பவ இடத்திற்கு விரைந்த காவல் துறையினர், பொதுமக்களிடம் பேச்சுவார்த்தை நடத்தியதை அடுத்து போராட்டம் கைவிடப்பட்டது. நகராட்சி நிர்வாகம் உடனடியாக சாலைகளை சீரமைத்து தர வேண்டும் என்று அப்பகுதி மக்கள் கோரிக்கை வைத்துள்ளனர்.
