கோயம்புத்தூர்: தஞ்சாவூரைச் சேர்ந்த சரண்யா தனது கணவர் கோபிநாத் மற்றும் குழந்தைகளுடன் கோவை மணியகாரன்பாளையம் நட்சத்திரா கார்டன் பகுதியில் வசித்து வருகிறார். இவரது வீட்டில் வெவ்வேறு பகுதியில் கோவை மாநகராட்சி மேயர் கல்பனாவின் தாயார் காளியம்மாள், தம்பி குமார் ஆகியோர் வசித்து வருகின்றனர். இந்நிலையில் கடந்த இரு மாதங்களாக கோவை மாநகராட்சி மேயர் கல்பனா ஆர்.எஸ்.புரத்தில் உள்ள அவரது அரசு குடியிருப்பில் தங்காமல், தனது தம்பி குமாரின் இல்லத்தில் கணவருடன் வசித்து வருகிறார்.
4 வீடுகள் உள்ள கட்டடத்தில் தங்கியிருக்கும் மேயர் கல்பனா, சரண்யாவை அவரது வீட்டிலிருந்து காலி செய்ய வைக்க தொடர்ச்சியாக பல தொந்தரவுகளை செய்து வருவதாக குற்றம்சாட்டப்படுகிறது. அதே பகுதியில் 2 வீடுகளில் மேயரின் உறவினர்களும் தங்கியுள்ளனர்.
சமையலறை மீது சிறுநீர், நாப்கின் என நீளும் கொடூரம்?: இது குறித்து சரண்யா கூறுகையில், கல்பனா மேயர் ஆவதற்கு முன்பு நன்றாக பழகினார். ரூ.15,000 பணம் கொடுக்கல் வாங்கலில் ஏற்பட்ட பிரச்னைக்கு தங்களிடம் மோசமான அணுகுமுறையில் ஈடுபட்டு வருதாகவும், தங்கியுள்ள கட்டடத்தில் இருக்கும் பொதுவான கேட்டை பூட்டுப்போட்டு வைத்துக்கொண்டு, காரைக் கூட வெளியில் எடுக்க முடியாத சூழலை ஏற்படுத்தி வைத்திருப்பதாக தெரிவித்துள்ளார்.
மேலும், கெட்டுப்போன உணவு வகைகள், கோழி இறைச்சி போன்றவற்றை கொண்டு வந்து சரண்யா வீட்டின் சமையலறையின் அருகில் கொட்டுவதை வாடிக்கையாக செய்வதாகவும், கொடுமையின் உச்ச கட்டமாக வாளியில் சிறுநீரை பிடித்து மேயரின் தம்பி தங்களது சமையலறையில் சுவற்றின் மீது ஊற்றுவதாகவும் வேதனையுடன் தெரிவித்துள்ளார். மேலும், பெண்கள் பயன்படுத்தும் நாப்கின்களை தங்களின் வீட்டு பகுதியில் வீசி அசுத்தப்படுத்துவதாகவும் அவர் கூறியுள்ளார். இது தொடர்பான சிசிடிவி கேமரா காட்சிகள் வைத்திருப்பதாகவும் அவர் தெரிவித்தார்.
கல்பனா மேயரானவுடன் தினமும் குப்பை எடுக்க இந்த பகுதிக்கு வாகனங்கள் வருவதாகவும், தூய்மைப்பணியாளர்கள் அவரது இல்லத்திலேயே வேலை செய்வதாகவும் இரண்டு ஆண்டுகளாகவே இவர்களின் டார்ச்சர் அதிகமாக இருப்பதாகவும், சமீபகாலமாக மேயர் கல்பனா இந்த வீட்டில் தங்க ஆரம்பித்தவுடன் தொல்லைகள் அதிகரித்து இருப்பதாகவும் கூறியுள்ளார்.
தகாத வார்த்தைகளால் பேசிவருதாக குற்றச்சாட்டு: இது தொடர்பாக தமிழக முதல்வர் மற்றும் மனித உரிமை ஆணையத்திற்கு புகார்கள் அனுப்பி இருப்பதாகவும் அவர் தெரிவித்தார். சிறுநீர் மற்றும் கெட்டுப்போன உணவு பண்டங்களில் இருந்து வெளியேறும் தூர்நாற்றத்தால் வீட்டில் குழந்தைகள், பெரியவர்கள் என யாராலும் இருக்க முடியவில்லை என மனம் வருந்தினார், சரண்யா. தொடர்ந்து தங்களை திட்டமிட்டு டார்ச்சர் செய்வதுடன், மேயர் கல்பனாவின் தம்பி குமார் தகாத வார்த்தைகளிலும் தங்களை இழிவாக பேசி வருவதாகவும், இதன் காரணமாகவே சிசிடிவி கேமராவை பொருத்தி அவர்கள் செய்யும் நடவடிக்கைகளை பதிவு செய்திருப்பதாகவும் அவர் தெரிவித்தார்.
