கோவை அம்மன் குளம் தாமு நகர் அருகே பொங்கல் விழாவை முன்னிட்டு கபடிப் போட்டிகள் நடைபெற்றன. இந்தப் போட்டியில் அதே பகுதியைச் சேர்ந்த நவீன்குமார் என்ற இளைஞர் மூன்று வெளியூர் கபடி வீரர்களை வைத்து விளையாடி போட்டியில் வெற்றி பெற்றதாகத் தெரிகிறது.
இந்நிலையில், போட்டி முடிந்த பிறகு அம்மன் குளத்தைச் சேர்ந்த விஜயகுமார் என்பவர், வெளியூர் வீரர்களை வைத்து கபடி விளையாடியது தொடர்பாக நவீன்குமாருடன் வாக்குவாதத்தில் ஈடுபட்டுள்ளார்.
அப்போது ஆத்திரமடைந்த விஜயகுமார் மறைத்து வைத்திருந்த கத்தியால் நவீனைக் குத்திவிட்டு அங்கிருந்து தப்பிச் சென்றுள்ளார்.
இதையடுத்து அங்கிருந்தவர்கள் நவீன்குமாரை மீட்டு சிகிச்சைக்காக கோவை அரசு மருத்துவமனையில் சேர்ந்தனர். அங்கு தீவிர சிகிச்சைப் பிரிவில் அனுமதிப்பட்ட நவீன்குமார் நேற்று நள்ளிரவில் சிகிச்சை பலனின்றி உயிரிழந்தார்.
இது தொடர்பாக ராமநாதபுரம் காவல் துறையினர் வழக்குப்பதிவு செய்து விசாரணை மேற்கொண்டுவருகின்றனர்.
இதையும் படிங்க: லயோலா கல்லூரி மாணவர் தூக்கிட்டு தற்கொலை
