காஞ்சிபுரம் மாவட்டம் மாமல்லபுரத்தில் நடக்கும் இருநாட்டுத் தலைவர்களுடனான பேச்சுவார்த்தையில் கலந்துகொள்வதற்காக சீன அதிபர் ஜி ஜின்பிங் சென்னைக்கு வருகை தந்திருக்கிறார். இது ஒரு வரலாற்று நிகழ்வு என்பதால், தமிழ்நாடு அரசும் மத்திய அரசும் பல சுவாரஸ்யமான நிகழ்வுகளை ஏற்பாடு செய்திருக்கின்றன. கண்கவர் கலைநிகழ்ச்சிகளுடன் ஒருசில ஆச்சர்ய பரிசுகளையும் அவருக்கு வழங்க ஏற்பாடு செய்திருக்கிறது தமிழ்நாடு அரசு.
இதற்காக சீன அதிபர் ஜி ஜின்பிங் உருவம் பதித்த சிவப்புப் பட்டுப் பொன்னாடை ஒன்று அவருக்காகத் தயார் செய்யப்பட்டு இருக்கிறது. இந்தப் பட்டுப் பொன்னாடை கோவை மாவட்டம் சிறுமுகையில் பட்டு கைத்தறி நெசவாளர்களால் நெய்யப்பட்டிருக்கிறது. மிகவும் தத்ரூபமாகவும் அழகாகவும் நெய்யப்பட்டுள்ள இந்தப் பட்டுப் பொன்னாடை, கிளாசிக் பட்டு நூல்களைக் கொண்டு நெய்யப்பட்டிருக்கிறது.
சீனாவின் தேசியக் கொடி சிவப்பு நிறம் என்பதால், இந்தப் பட்டுப் பொன்னாடையும் சிவப்பு நிறத்தில் நெய்யப்பட்டிருக்கிறது. பொன்னாடையின் மையத்தில் தங்க ஜரிகையில் ஜி ஜின்பிங் சிரித்த முகத்துடன் இருப்பது போல் வடிவமைக்கப்பட்டிருக்கிறது.
அவருக்குக் கொடுக்கும் பரிசுகள் ஏராளம் என்றாலும், நெசவாளர்களின் இந்தப் பட்டுப் பொன்னாடை நிச்சயமாக அவரின் இதயத்தைத் தொடும். ஜி ஜின்பிங்குடன் சிறுமுகை பட்டும் சீனாவுக்குப் பயணப்பட இருக்கிறது.
