கோயம்புத்தூர் மாவட்டம், பொள்ளாச்சி அருகே உள்ள சேத்துமடை சோதனைச் சாவடி அருகே ரவி என்பவரின் தோட்டத்தில் ஒற்றை ஆண் காட்டு யானை புகுந்துள்ளது. மேலும், தோட்டத்தில் வேலை பார்க்கும் கூலித்தொழிலாளியின் வீட்டையும், சமைத்து வைத்திருந்த பொருட்களையும் சேதப்படுத்தியுள்ளது.
தோட்டத்தில் அட்டகாசம் செய்யும் யானை
இதுகுறித்து தகவல் அறிந்து சம்பவ இடத்திற்கு விரைந்து வந்த வனத்துறையினர் அந்த யானையை வனப்பகுதிக்குள் விரட்டியடித்தனர்.
அதேபோல், ஆழியாறு குரங்கு அருவி அருகே மற்றொரு ஒற்றை ஆண் காட்டு யானை வனத்தை விட்டு வெளியே வந்து சாலையோரம் உலாவியதாக வனத்துறையினருக்குத் தகவல் தெரிவிக்கப்பட்டது.
இதையடுத்து சுற்றுலாப் பயணிகளின் பாதுகாப்பு கருதி வனத்துறையினர் யானையை அடர் வனப்பகுதிக்குள் விரட்டியடித்தனர். இருப்பினும் சுற்றுலாப் பயணிகள் பாதுகாப்பாக செல்லுமாறு ஒலிபெருக்கி மூலம் வனத்துறையினர் அறிவுறுத்தினர்.
