கடந்த மாதம் 27, 30ஆகிய தேதிகளில் நடைபெற்ற உள்ளாட்சித் தேர்தலில் மாவட்ட கவுன்சிலர்கள், ஒன்றிய கவுன்சிலர்கள் தேர்ந்தெடுக்கப்பட்டனர். அவர்கள் மூலம் மாவட்ட தலைவருக்கான மறைமுக தேர்தல் இன்று நடைபெற்றது.
இதில் மாவட்ட குழு தலைவராக சூலூர் ஒன்றிய 7ஆவது வார்டு சாந்திமதி யாரும் மனு தாக்கல் செய்யாத நிலையில் ஒரு மனதாக தேர்வு செய்யப்பட்டார். அவருக்கு கோவை மாவட்ட ஆட்சியர் அலுவலகத்தில் மாவட்ட ஆட்சியர் தலைமையில் வாழ்த்துகள் தெரிவிக்கப்பட்டன. அதிமுக உறுப்பினர்களும் வாழ்த்துக்களை தெரிவித்தனர்.
பின்னர், செய்தியாளர்களிடம் பேசிய மாவட்ட ஆட்சியர் ராசாமணி, தேர்தல் ஆணையத்தின் அறிவிப்பின்படி இன்று மாவட்ட குழு தலைவர், ஊராட்சி ஒன்றிய குழுத் தலைவர்களுக்கான தேர்தல் நடைபெற்றுவருகிறது.
இதில் எவ்வித போட்டியுமின்றி சாந்திமதி மாவட்ட குழு தலைவராக தேர்ந்தெடுக்கப்பட்டுள்ளார். மேலும், துணை தலைவருக்கான மறைமுகத் தேர்தலானது மதியம் தொடங்கப்படும் என்று அறிவித்தார்.
அதன்பின் பேசிய சாந்திமதி, முதலமைச்சர் பழனிசாமி, துணை முதலமைச்சர் ஓ. பன்னீர்செல்வம் ஆகியோர் ஊரக உள்ளாட்சித் துறை அமைச்சர் எஸ்.பி. வேலுமணியின் நல்லாசியுடன் இந்த பொறுப்பை ஏற்றுக் கொள்வதாக தெரிவித்தார். மேலும், மக்களுக்கு அனைத்து நன்மைகளையும் செய்து கொள்வேன் என்று உறுதி கூறினார்.
இதையும் படிங்க: மறைமுக தேர்தல்: திமுக உறுப்பினர் போட்டியின்றி தேர்வு
