கோயம்புத்தூர் மாவட்டத்தில் முன்பு இருந்ததைவிட, கரோனா தொற்று நாளுக்கு நாள் அதிகரித்து வருகிறது. இதனைக் கட்டுப்படுத்த மாநில அரசும், மத்திய அரசும் பல்வேறு நடவடிக்கைகளை எடுத்து வருகின்றன. இருப்பினும், கோவை மாவட்டத்தில் கரோனா தொற்றால் பாதிக்கப்பட்டவர்களின் எண்ணிக்கை அதிகரித்துக் கொண்டே செல்கிறது. இந்நிலையில், கோவையில் இன்று (ஆகஸ்ட் 23) 392 பேருக்குப் புதிதாக கரோனா தொற்று உறுதி செய்யப்பட்டுள்ளது.
மாவட்டத்தில் கரோனாவால் பாதிக்கப்பட்டோரின் எண்ணிக்கை 11 ஆயிரத்து 751ஆக அதிகரித்துள்ளது. ஒரே நாளில் இரண்டு பேர் உயிரிழந்ததைத் தொடர்ந்து, கோவை மாவட்டத்தில் உயிரிழந்தவர்களின் எண்ணிக்கை 237ஆக அதிகரித்துள்ளது. சிகிச்சைப் பெற்று வந்தவர்களில், 444 பேர் இன்று குணமடைந்து வீடு திரும்பியுள்ளனர். இதன் மூலம் கோவையில் இதுவரை கரோனா தொற்றிலிருந்து குணமடைந்தவர்களின் எண்ணிக்கை 8ஆயிரத்து 416ஆக அதிகரித்துள்ளது.
கோவை மாவட்டத்தைப் பொறுத்தவரைக் கடந்த மே மாத இறுதியில், 146 பேருக்கு மட்டும் கரோனா பாதிப்பு இருந்தது. தற்போது தொற்று எண்ணிக்கை 11ஆயிரத்தைக் கடந்து விட்டது. கடந்த ஒரு மாதமாக கரோனா வைரஸ் சென்னையைப்போல் வேகமாகப் பரவி வருகிறது. தினம்தோறும் சராசரியாக 300 முதல் 400 வரை, புதிய கரோனா நோயாளிகள் கண்டறியப்படுகின்றனர். நாளுக்கு நாள் அதிகரிக்கும் கரோனா பாதிப்பு பொதுமக்களிடையே பீதியை ஏற்படுத்தியுள்ளது.
இந்நிலையில் கோவை அரசு மருத்துவமனையில் செயற்கை கை, கால்கள் தயாரிக்கும் மையத்தை திறந்து வைக்க கோவை வந்த சுகாதாரத்துறை அமைச்சர் விஜயபாஸ்கர், சுகாதாரத்துறைச் செயலர் ராதாகிருஷ்ணன் ஆகியோர் கரோனா தடுப்பு நடவடிக்கைகள் குறித்து அரசு மருத்துவமனை முதல்வர், ஈ.எஸ்.ஐ மருத்துவமனை முதல்வர், மாவட்ட ஆட்சியரிடம் ஆலோசனை நடத்தினார்.
இதையும் படிங்க: கோவை அரசு மருத்துவமனையில் செயற்கை கால்கள் தயாரிக்கும் மையம் திறப்பு!
