தமிழ்நாடு முழுவதும் முதல்கட்டமாக இன்று ஊரக உள்ளாட்சித் தேர்தல் தொடங்கி நடைபெற்றுவருகிறது. இதில் கோவை மாவட்டத்திலுள்ள 12 ஊராட்சி ஒன்றியங்களில் முதல்கட்டமாக ஐந்து ஊராட்சி ஒன்றியங்களில் உள்ளாட்சித் தேர்தல் காலை 7 மணிக்கு தொடங்கியது.
இந்த ஊராட்சி ஒன்றியங்களில் 1,220 பதவிகளுக்கு 2,939 வேட்பாளர்கள் போட்டியிடுகின்றனர். ஐந்து ஊராட்சி ஒன்றியங்களில் 3 லட்சத்து 46 ஆயிரத்து 350 வாக்காளர்கள் வாக்களிக்கவுள்ளனர். வாக்காளர்கள் வாக்களிப்பதற்காக 293 வாக்குச்சாவடி மையங்களில் 642 வாக்குச்சாவடிகள் அமைக்கப்பட்டுள்ளன.
இதில் 148 வாக்குச்சாவடிகள் பதற்றம் நிறைந்தவை எனக் கண்டறியப்பட்டு 48 வாக்குச்சாவடி மையங்களில் ஒளிப்பதிவு செய்யவும், 24 மையங்களில் வெப் கேமரா மூலம் கண்காணிக்கவும் தேர்தல் ஆணையம் முடிவு செய்துள்ளது. இந்தத் தேர்தல் பணியில் 4,494 அலுவலர்கள் ஈடுபட்டுள்ளனர் இதுதவிர பாதுகாப்பிற்காக 2,350 காவலர்களும் 100 முன்னாள் ராணுவத்தினரும் பாதுகாப்புப் பணியில் ஈடுபட்டுள்ளனர்.
கோவை மதுக்கரை ஊராட்சி ஒன்றியத்தில் இன்று காலை வாக்குப்பதிவு தொடங்கியது. இதில் மலுமிச்சம்பட்டி ஊராட்சி ஒன்றிய தொடக்கப் பள்ளியில் அமைக்கப்பட்ட வாக்குச்சாவடி மையத்தில் நாம் தமிழர் கட்சி சார்பில் மாவட்ட கவுன்சிலர் பதவிக்குப் போட்டியிடும் ரூபனுக்கு ஒதுக்கப்பட்ட கரும்பு விவசாயி சின்னம் பட்டியலில் ஒட்டப்படாததால் தேர்தல் அலுவலரிடம் புகார் தெரிவித்தார்.
இதனையடுத்து கரும்பு விவசாயி படம் வேட்பாளர்கள் பட்டியலில் ஒட்டப்பட்டது. இதுகுறித்து ரூபன் கூறுகையில், மாற்றத்திற்கான வேட்பாளர்களாக நாம் தமிழர் கட்சியினர் போட்டியிடுகிறோம். மக்களிடம் எங்களுடைய செல்வாக்கைக் கொண்டு செல்லவிடாமல் தடுப்பதற்காக பட்டியலில் எங்களது சின்னம் விடுபட்டுள்ளதாக குற்றம்சாட்டினார்.
இதையும் படிங்க: மின் வாரிய அலுவலகங்களுக்கு பொது விடுமுறை அறிவிப்பு!
