பொள்ளாச்சியில் பெண்கள் பாலியல் வன்கொடுமை செய்யப்பட்ட விவகாரத்தில் கடந்த சில நாட்களாக சமூக வலைதளங்களில், பல்வேறு தரப்பினர் கடுமையாக விமர்சனம் செய்து வருகின்றனர். இவ்விவகாரம் தொடர்பாக சதீஷ், திருநாவுக்கரசு, வசந்தகுமார், சபரிராஜன் ஆகியோர் மீது வழக்குப்பதிவு செய்து போலீசார் கைது செய்தனர்.
இந்நிலையில் தமிழகத்தின் பல்வேறு பகுதிகளிலுள்ள மாணவர்கள், குற்றச்செயலில் ஈடுபட்டவர்கள் மீது கடும் நடவடிக்கைகள் எடுக்க வேண்டும் என வலியுறுத்தி ஆர்ப்பாட்டம் செய்து வரும் நிலையில், கைதான நால்வர் மீதும் குண்டர் சட்டம் பாய்ந்துள்ளது. இதனிடையே
பாதிக்கப்பட்ட பெண்ணின் அண்ணனை தாக்கியதாக அதிமுகவைச் சேர்ந்த பார் நாகராஜ், கைதாகி ஜாமினில் விடுவிக்கப்பட்டார். இதையடுத்து நாகராஜ் அதிமுகவின் அடிப்படை உறுப்பினர் பொறுப்பிலிருந்து கட்சியின் தலைமை நீக்கியது.
இதனிடையே பொள்ளாச்சி பாலியல் விவகாரம் தொடர்பாக வெளியான வீடியோவில் பார் நாகராஜ் இருப்பதாக செய்திகள் வெளியாகின. ஆனால், இதற்கு மறுப்பு தெரிவித்து நாகராஜ் வீடியோ ஒன்றை வெளியிட்டு இருந்தார். அதில் தனக்கும், இந்த பிரச்னைக்கும் எந்த சம்பந்தமும் இல்லை என கூறியிருந்த நிலையில் தற்போது மாவட்ட ஆட்சியர் அலுவலகத்தில் மனு ஒன்றை அளித்துள்ளார்.
பின்னர் செய்தியாளர்களிடம் அவர் கூறியதாவது,
சமூக வலைதளங்களில் வலம் வரும் வீடியோவில் இருப்பது நான் அல்ல. செய்திகளில் நான் தலைமறைவாக இருப்பதாக ஒளிப்பரப்ப படுவதால் தங்கள் குடும்பம் மிகுந்த மன உளச்சலுக்கு ஆளாகி உள்ளது. மார்பிங் செய்து வீடியோ வெளியிடப்பட்டு இருக்கிறது. தேர்தல் நேரத்தில் அரசியல் லாபத்திற்காக பொய்யான தகவல்கள் பரப்பப்படுகிறது.
நேற்று உடைக்கப்பட்ட பார் தன்னுடையது அல்ல. டாஸ்மாக் பாரை கடந்த எட்டு மாதங்களுக்கு முன்பே விற்று விட்டேன். தனக்கு வேண்டாதவர்கள்தான் பாரை உடைத்துள்ளனர். தேவை இல்லாத அவதூறுகளை என் மீது பரப்ப வேண்டாம். எந்த நேரமும் காவல் விசாரணைக்கு நான் ஆஜாராக தயார். இதுகுறித்து மாவட்ட ஆட்சியர் மற்றும் காவல் கண்காணிப்பாளர் ஆகியோரிடம் மனு அளித்துள்ளேன், என்றார்.
அவருடன் அவரது தாயார் பேபியும் தனியாக மாவட்ட ஆட்சியரிடம் மனு அளித்துள்ளது குறிப்பிடத்தக்கது.
