சேலம் மாவட்டத்தைச் சேர்ந்த சத்தியாவணி என்பவர் மாவட்ட ஆட்சியர் அலுவலகத்தில் கணக்காளராக பணிபுரிந்துவருகிறார். இவருக்கு உடல்நிலை சரியில்லாத காரணத்தால் பல்லாவரம் அடுத்து அனகாபுத்தூர் லட்சுமி நகரில் உள்ள தனது மகள் வீட்டில் மருத்துவ விடுப்பில் ஓய்வு எடுத்து வந்துள்ளார்.
கடந்த 18ஆம் தேதி வாலிபர் ஒருவர் அந்த வீட்டின தண்ணீர் தொட்டியை சுத்தம் செய்ய வந்துள்ளார். அப்போது, சத்தியவானி தனியாக இருப்பதை பயன்படுத்தி அந்த இளைஞர் கத்தியைக்காட்டி மிரட்டி அவர் அணிந்திருந்த ஏழு சவரன் தங்க நகையை பறித்துக்கொண்டு தப்பியோடினார்.
இதுகுறித்து சங்கர் நகர் காவல் துறையினரிடம் சத்தியவாணி புகார் தெரிவித்தார். புகாரின் அடிப்படையில் வழக்குப்பதிவு செய்து காவலர்கள் விசாரணை மேற்கொண்டுவந்தனர் அந்தப் பகுதியில் சிசிடிவி கேமரா இல்லாததால் இரண்டு தனிப்படை அமைத்து அனகாபுத்தூர் மற்றும் அதை சுற்றியுள்ள பகுதிகளில் உள்ள 226 சிசிடிவி கேமராக்களை ஆய்வு செய்தனர்.
அதில் பதிவான காட்சிகளை வைத்து நடத்திய விசாரணையில் சத்தியவாணியிடம் நகையை பறித்துச் சென்றவர் சூளைமேட்டைச் சேர்ந்த கார்த்திக் (எ) புறா கார்த்திக்(28) என்பது தெரியவந்தது. இதனைத்தொடர்ந்து 28 நாட்கள் கழித்து ஈரோட்டில் கார்த்திக்கின் மாமியார் வீட்டில் வைத்து துப்பாக்கி முனையில் அவரை காவலர்கள் கைது செய்தனர்.
பின்னர் அவரிடம் நடத்திய விசாரணையில், கார்த்திக் முதன்முதலில் புறா மற்றும் நாய்களை வாங்கத்தான் செயின் பறிப்பில் ஈடுபட்டதாக கூறியுள்ளார். பின்னர் செயின் பறிப்பில் மூலம் எளிதில் பணம் கிடைக்கிறது என்பதற்காக தொடர்ச்சியாக செயின்களை பறித்து புறாக்கள் மற்றும் நாய்களை தொடர்ந்து வாங்கி வந்ததாக தெரிவித்துள்ளார்.
புறநகர் பகுதிகளில்தான் மூதாட்டிகள் அதிக அளவில் நகைகளை அணிந்திருப்பார்கள். அவர்களிடம்தான் சுலபமாக கொள்ளையடிக்க முடியும் என்றும் கடைசியாக ஈரோட்டுக்குச் செல்வதற்கு முன்பு, சங்கர் நகர், அஸ்தினாபுரம், ஆதம்பாக்கம், கொளத்தூர், வடபழனி, மடிப்பாக்கம் ஆகிய இடங்களில் 16க்கும் மேற்பட்ட இடங்களில் தனது செயின் பறிப்பு கைவரிசையை காட்டிவிட்டு ஈரோட்டிற்கு சென்றதாகவும் அவர் வாக்குமூலம் அளித்துள்ளதாக காவல் துறையினர் தெரிவித்துள்ளனர்.
இதனைத்தொடர்ந்து, அவரிடமிருந்த இரண்டு சக்கர வாகனம் மற்றும் 35 சவரன் தங்க நகைகளை காவலர்கள் மீட்டு அவரை நீதிமன்றத்தில் ஆஜர்படுத்தி பின்னர் புழல் சிறையில் அடைத்தனர்.
இதையும் படிங்க: சென்னையில் சங்கிலித் தொடர் போல் கஞ்சா விற்பனை - மூன்று பேர் கைது
