சென்னை: காமராஜர் சாலையில் உள்ள ஜெயலலிதா நினைவிடத்தில் ஓ.பன்னீர்செல்வத்தின் ஆதரவாளர்கள் புகழேந்தி, கொளத்தூர் கிருஷ்ணமூர்த்தி உள்ளிட்டோர் மலர்த்தூவி மரியாதை செலுத்தினர்.
பின்னர் செய்தியாளர்களைச் சந்தித்த புகழேந்தி, "இன்று என்னுடைய பிறந்தநாள், 25 ஆண்டுகளாக ஜெயலலிதாவிடம் வாழ்த்துப்பெற்று வருகிறேன். ஜெயலலிதாவிடம் வாழ்த்துப்பெற வேண்டும் என இன்று நினைவிடம் வந்து மரியாதை செலுத்தினேன். நேற்றைய தீர்ப்பு ஓ.பன்னீர்செல்வம் அவர்களுக்கு பின்னடைவு இல்லை. நீதிமன்றத்தீர்ப்புத்தொடர்பாக உச்ச நீதிமன்றம் செல்ல இருக்கிறோம். ஓ.பன்னீர்செல்வம் கட்சி அலுவலகத்திற்கு வருவதற்கு யாரிடம் அனுமதி கேட்க வேண்டும்.
காவல் துறை இரண்டு கதவுகளையும் திறந்து வைத்திருந்தால் அன்று கொலை நடந்திருக்கும், இரண்டு தரப்பினருக்கும் இடையில் தான் மோதல் ஏற்பட்டது, ஒருதரப்பு கூறுவது தவறானது. அதிமுக தலைமைக்கழகம் எம்ஜிஆரின் துணைவியார் ஜானகி அவர்களால் அதிமுக கட்சிக்கு கொடுக்கப்பட்ட இடம். ஆனால், இன்று எடப்பாடி பழனிசாமி தரப்பினர் கொண்டாடுகின்றனர்.
ஜெயலலிதா அவர்களால் முதலமைச்சராக்கப்பட்டவர் ஓ.பன்னீர்செல்வம் தான். ஜல்லிக்கட்டுப்போராட்டம் நடைபெற்ற பொது ஓ.பன்னீர்செல்வம் தான் முதலமைச்சராக இருந்தார். ஜல்லிக்கட்டுப் பிரச்னையை சுமூகமாக முடித்தவர் ஜல்லிக்கட்டு நாயகன் ஓ.பன்னீர்செல்வம் தான். தூத்துக்குடியில் 13 பேரை சுட்டுக்கொன்றது எடப்பாடி பழனிசாமி ஆட்சியில் தான். டிவியைப் பார்த்து தான் சுட்டுக்கொன்றதே தெரியும் என்று தெரிவித்தார்.
சொந்த அண்ணனே பழனிசாமியை திருடன் எனச்சொல்கிறார். நீதிமன்றம் மட்டுமல்ல மக்கள் மன்றமே எங்கள் பின்னால் நிற்கிறது, அங்கு சந்திப்போம். ஜூலை 11ஆம் தேதி நடைபெற்ற அனைத்து அக்கிரமத்துக்கும் காரணம், அதிமுக தலைமைக்கழக மேலாளர் மகாலிங்கம் தான்.
உயர் நீதிமன்றத்தில் நேற்று நடைபெற்ற வழக்கின் தவறுகளை உச்ச நீதிமன்றத்தில் வழக்குத்தொடரும்போது எங்களுக்கு ஆதரவாகத் தான் தீர்ப்பு வரும். அனைத்து முன்னாள் அமைச்சர்கள் மீதும் ரெய்டு நடைபெற்று வருகிறது. இந்த நிலையில் எடப்பாடி பழனிசாமி சிறையில் இருந்து கட்சியை நடத்துவாரா?
டெல்லியில் இருப்பவர்கள் முக்கியமான தலைவர்கள் என்றால், எடப்பாடி பழனிசாமியைப் பார்க்க மாட்டார்கள். போயஸ் தோட்ட இல்லத்திற்கு வந்த தீர்ப்புபோல இந்த வழக்கிற்கும் எங்களுக்குச் சாதகமாகத்தான் தீர்ப்பு வரும். தமிழ்நாடு சபாநாயகர் திறமை வாய்ந்தவர் உன்னதமான மனிதர் நியாயமான தீர்ப்புகளை வழங்குவார்.
முதலமைச்சரைப் பற்றி பேசுவதற்கு எடப்பாடி பழனிசாமிக்கு எந்த அருகதையும் கிடையாது. மின் கட்டண உயர்வுக்கு எடப்பாடி பழனிசாமி போராட்டத்தினை அறிவித்திருக்கிறார். அவருடைய ஆட்சியின் செயல்களால் தான் மின் கட்டண உயர்வுக்கு தற்போது தள்ளப்பட்டுள்ளோம். முதலமைச்சர் கரோனா தொற்றில் இருந்தபோதுகூட கள்ளக்குறிச்சி சம்பவத்திற்கு உடனடியாக நடவடிக்கை எடுத்தார். ஆனால், தூத்துக்குடி துப்பாக்கிச்சூடு சம்பவம் நடைபெற்றபோது எடப்பாடி பழனிசாமி என்ன செய்தார்.
ஆளுங்கட்சியை விமர்சனம் செய்யத்தகுதி உடைய ஒரே நபர் ஓ.பன்னீர்செல்வம் மட்டும் தான். ஓ.பன்னீர்செல்வம் இருக்கும் வரை கட்சி கணக்குகள் சரியாக இருந்தது. திண்டுக்கல் சீனிவாசன் உள்ளிட்டோர் கட்சியைச் சுரண்டி விடுவர். எம்ஜிஆர் மற்றும் ஜெயலலிதாவின் சொத்துகளை சூறையாட நினைப்பவர்கள் சிறைக்குத் தான் செல்வார்கள். நடப்பது ஸ்டாலின் ஆட்சி. அதனால் நிச்சயம் சிறைக்குத் தான் செல்வார்கள்" என கூறினார்.
இதையும் படிங்க: அதிமுக அலுவலகத்தில் சீல் அகற்றம்
