மனிதத்தை காக்கும் பாப்புலர் ஃப்ரெண்ட் ஆஃப் இந்தியா

சென்னை: கரோனா தொற்றால் பாதிக்கப்பட்டவர்களுக்கே உதவி செய்ய யாரும் முன்வராத நிலையில், கரோனாவால் உயிரிழந்தவர்களின் உடல்களை அடக்கம் செய்யும் பணியில் ஈடுபட்டு வரும் பாப்புலர் ஃப்ரெண்ட் ஆஃப் இந்தியா என்னும் தன்னார்வலர்களின் செயல் பலரது பாராட்டை பெற்றுள்ளது.

கரோனா தொற்றால் இறந்தவர்களின் உறவினர்கள்கூட கரோனா அச்சம் காரணமாக அவர்களது உடல்களை அடக்கம் செய்ய முன்வருவதில்லை. குறிப்பாக கரோனா தொற்று காரணமாக இறந்தவர்களின் குடும்பத்தினர் தனிமைப்படுத்தப்பட்டுள்ளதால், இறந்தவர்களின் உடலை உரிய மரியாதையுடன் அடக்கம் செய்வதில் சிக்கல் ஏற்பட்டுள்ளது.

கரோனா தொற்றினால் இறந்தவர்களின் உடல் கண்ணியமான முறையில் அவர்களின் மத நம்பிக்கைபடி அடக்கம் செய்யப்படவேண்டும் என்பதை கருத்தில்கொண்டு சென்னையின் பல்வேறு பகுதிகளில் பாப்புலர் ஃப்ரெண்ட் சார்பாக தன்னார்வலர்கள் ஈடுபட்டு வருகின்றனர். இந்த செயல், பாப்புலர் ஃப்ரெண்ட் ஆஃப் இந்தியா சென்னை மாவட்ட தலைவர் அபூபக்கர் சாதிக் தலைமையில் நடைபெற்று வருகிறது.

உலக சுகாதார அமைப்பின் பாதுகாப்பு வழிகாட்டுதல்களை பின்பற்றி சென்னையில் இதுவரை 90 உடல்களை பாப்புலர் ஃப்ரெண்ட் ஆஃப் தன்னார்வலர்கள் அடக்கம் செய்துள்ளனர். சென்னை முழுவதும் பகுதி வாரியாக 18 குழுக்களாக பிரிந்து, ஒவ்வொரு குழுவிலும் குறைந்தது ஆறு பேர் என மொத்தம் 100க்கும் மேற்பட்டோர் உள்ளனர்.

பாதுகாப்புடன் உடல்களை அடக்கம் செய்யும் புகைப்படம்

கடந்த 16ஆம் தேதி சென்னை மண்ணடியை சேர்ந்த ஒருவர் கரோனா பாதிப்பால் உயிரிழந்தார். அவரது உடலை பாப்புலர் ஃப்ரெண்ட் மற்றும் எஸ்டிபிஐ கட்சியின் செயல் வீரர்கள் வண்ணாரப்பேட்டை கபர்ஸ்தான் பள்ளியில் நல்லடக்கம் செய்தனர்.

அதேபோன்று கடந்த 23ஆம் தேதி காலை விழுப்புரம் மாவட்டம் பெரம்பை பகுதியில் உயிரிழந்த ஒருவரின் உடலுக்கு இறுதி சடங்கு செலுத்துமாறு கோட்டக்குப்பம் சுகாதாரத் துறை ஆய்வாளர் ரவி, பாப்புலர் ஃப்ரெண்ட் பகுதி தலைவர் அஹமது அலியிடம் கேட்டுக்கொண்டார். உடனடியாக அங்கு சென்று பாப்புலர் ஃப்ரண்ட் ஆஃப் இந்தியாவின் தன்னார்வலர்கள் இறந்தவரின் சமுதாய முறைப்படி அவரது உடலை நல்லடக்கம் செய்தனர்.

இங்கு இஸ்லாமியர்கள் மீதான வெறுப்பை திணிக்கும் போக்கு ஒரு பக்கம் இருந்தாலும், மதத்தால் யாரையும் பிரிக்க முடியாது என்பதை இந்தச் சம்பவம் உணர்த்துகிறது. அது மட்டுமில்லாமல், பாப்புலர் ஃப்ரெண்ட் மற்றும் SDPI கட்சியை சேர்ந்த தன்னார்வலர்கள் மனிதத்தை காத்துள்ளனர்.

தோளில் இறப்பை சுமக்கிறோம்

உடல்களை அடக்கம் செய்ய பணம் தரமுடியவில்லையென்றால், இவர்களே அனைத்து செலவையும் ஏற்றுக்கொண்டு உடலை அடக்கம் செய்து வருகின்றனர். கரோனா போன்ற பெருந்தொற்று காலத்தில் தன்னுயிரை துச்சமென நினைத்து உழைக்கும் பாப்புலர் ஃப்ரெண்ட் தன்னார்வலர்களுக்கு ஒரு சல்யூட் அடித்து பாராட்டுவோம்.

அடக்கம் செய்வது உடல்களைத் தான்

இதையும் படிங்க: 18 கோடி ரூபாய் வசூல்செய்த காவல் துறை: ஊர் சுத்த போகாதீங்க மக்களே!