சென்னை: சென்னை அடையார் பகுதியில் எம்ஜிஆர் ஜானகி கல்லூரி எதிரே உள்ள பேருந்து நிலையத்தில் நின்று போக்குவரத்து காவல்துறையினர் வாகனச் சோதனையில் ஈடுபட்டுக் கொண்டிருந்தனர். அப்போது, அவ்வழியாக சாலையில் வந்து கொண்டிருந்த மூன்று பெண்கள் ஒரே வாகனத்தில் பயணித்துள்ளனர். இவர்களை மடக்கிப் பிடித்த போக்குவரத்து காவலர் ராஜேஷ் இது குறித்து விளக்கம் கேட்டபோது உடல்நிலை சரியில்லை எனக் கூறி, அங்கிருந்து வேகமாக தனது ஆண் நண்பர்களுடன் வாகனத்தை எடுத்து புறப்பட்டதாக கூறப்படுகிறது.
இதைக் கண்டு அருகில் டீக்கடை ஒன்றில் டீ குடித்துக் கொண்டிருந்த சென்னை ஊரப்பாக்கத்தை சேர்ந்த அருண்குமார் விக்ரம் என்பவர் இந்த மூன்று பெண்களையும், அவர்கள் ஓட்டி வந்த இருசக்கர வாகனத்தையும் புகைப்படம் எடுத்து, தனது ட்விட்டர் பக்கத்தில் பெருநகர சென்னை மாநகர காவல்துறை மற்றும் போக்குவரத்து காவல்துறையினை டேக் செய்து புகார் அளித்துள்ளார்.
இதையும் படிங்க: பொது சிவில் சட்டம் என்பது தேன் கூட்டில் கையை வைப்பது போன்றது - ஜவாஹிருல்லா எம்எல்ஏ
மூன்று பேர் பயணித்த வாகனத்தில் புகைப்படம் எடுத்ததை அறிந்த ஒரு பெண், அங்கு டீ குடித்திருந்த அருண் குமார் விக்ரமை நோக்கி வந்து, எந்த ஒரு கேள்வியும் கேட்காமல் அவரை தாக்கி, ஆபாசமாகப் பேசி நடு ரோட்டில் பொதுமக்கள் இருக்கும்பொழுது செருப்பைக் கழற்றி அடித்ததாக கூறப்படுகிறது.
உடனடியாக அங்கு பணியிலிருந்த போக்குவரத்துக் காவல்துறை காவலர் ராஜேஷ் இருவரையும் சமாதானம் செய்த பிறகு அனுப்பிவைத்தார். பின்னர் போக்குவரத்து காவலர் ராஜேஷ் முன்பே, மூன்று பேருடன் அதே வாகனத்தில் அவர்கள் பயணிக்க முயன்ற போது தனது பாணியில் மிரட்டி வாகனத்தை தள்ளிச் செல்லும்படி கூறியுள்ளார்.
இதைத் தொடர்ந்து தனது தொலைபேசியில் வீடியோ எடுத்துக் கொண்டிருந்த அருண்குமார் விக்ரமிடம், தான் காவல்துறையைச் சார்ந்தவரின் மகள் என்றும்; தன்னை புகைப்படம் எடுத்து ஒன்றும் செய்ய முடியாது என்றும் மிரட்டி, தன்னை எவ்வளவு வேண்டுமென்றாலும் புகைப்படங்களை எடுத்துக் கொள்ளுங்கள் என்றும் மிரட்டிவிட்டு சென்றுள்ளார்.
உடனே தன்னை தாக்கிய மூன்று பெண்கள் மீதும் நடவடிக்கை எடுக்கக்கோரி சென்னை அபிராமபுரம் காவல் நிலையத்தில் அருண்குமார் விக்ரம் புகார் அளித்தார். இந்தப் புகார் தொடர்பாக போலீசார் விசாரணை மேற்கொண்டு வருகின்றனர். மேலும், போலீசார் அவர்களுக்கு தலைகவசம் அணியாததுக்கு 1000 ரூபாயும், இரு சக்கர வாகனத்தில் மூன்று பேர் பயணித்ததற்கு 1000 ரூபாயும் அபராதம் விதித்தனர்.
இதையும் படிங்க: ஷூ திருடிய இருவருக்கு ரூ.41,000 அபராதம் விதிப்பு!
