சென்னை: அரசுப் பள்ளிகளை மேலும் வலுப்படுத்தும் ஒரு முக்கிய முயற்சியாக 'நம்ம ஸ்கூல் பவுண்டேஷன்' திட்டத்தை தமிழ்நாடு முதலமைச்சர் மு.க. ஸ்டாலின் தொடங்கி வைத்தார்.
நம்ம ஸ்கூல் பவுண்டேஷனுக்கு தலைவராக நியமிக்கப்பட்டுள்ள டிவிஎஸ் குழுமத் தலைவர் வேணு சீனிவாசன் பேசும்போது, 'இந்தாண்டு மழையில் தண்ணீர் தேங்குவது 80 சதவீதம் குறைந்துள்ளது. ஒரே வருடத்தில் 80 சதவீதம் பணிகளை அரசு சரிசெய்துள்ளது. மீதமுள்ள 20 சதவீதம் பணிகளையும் முடிக்க வேண்டும்.
நான் படித்த காலத்தை விட தற்போது ஆசிரியர்களுக்கு நல்ல சம்பளம் வழங்கப்படுகிறது. ஆசிரியர்களுக்கு நவீன காலத்திற்கு ஏற்ப டிஜிட்டல் முறையில் கல்வி கற்பிக்க பயிற்சியளிக்க வேண்டும். டிவிஎஸ் நிறுவனம் தென்னிந்தியாவில் 2,500 பள்ளிகளை மேம்படுத்த தத்தெடுத்ததில் தமிழ்நாட்டில் மட்டும் 2000 பள்ளிகள் உள்ளன.
சர்வதேச தரத்தை ஒப்பிடுகையில் 10ஆம் வகுப்பு முடிக்கும் மாணவர்களுக்கு 6ஆம் வகுப்பு முடித்த அளவிற்கான கல்வியறிவே இருக்கிறது. அண்ணா பல்கலை முன்னாள் மாணவர்கள் வழங்கும் நிதியை சிறப்பாகப் பயன்படுத்துகிறது. இந்த குறுகிய காலத்தில் சிறந்த மாநிலமாக தமிழ்நாட்டை கொண்டு வந்ததற்கு நாங்கள் நன்றிக்கடன் பட்டுள்ளோம். அரசுப் பள்ளிகளின் தரத்தை உயர்த்துவதற்கு அனைவரும் இணைந்து பாடுபட வேண்டும்' எனத் தெரிவித்தார்.
பள்ளிக் கல்வித்துறை அமைச்சர் அன்பில் மகேஷ் பொய்யாமொழி பேசும்போது, 'மு.க. ஸ்டாலின் முதலமைச்சராக இல்லாமல், தந்தையாக ஒவ்வொரு திட்டத்தையும் செயல்படுத்தி வருகிறார். இந்தியாவிலேயே பள்ளிக்கல்வித்துறைக்கு அதிக நிதி ஒதுக்கிய முதல் மாநிலம் தமிழ்நாடு தான். அதிலும் 90 சதவீதம் நிதி நிர்வாகச் செலவிற்கு செல்கிறது.
மேலும் வளர்ந்து வரும் தொழில்நுட்பத்திற்கு ஏற்றவாறு, மூன்றில் ஒரு பங்கு ஆசிரியர்களின் பயிற்சிக்காக செலவிடப்படுகிறது. ஏற்கெனவே இதுபோன்ற நிதி வழங்கப்படுகிறது. அரசு மட்டுமே அனைத்தையும் செய்துவிட முடியாது.
ஆனால், அந்த நிதி எங்கு செலவிடப்படுகிறது என்பதை வெளிப்படைத்தன்மையாக தெரிவிக்க ஓர் சீரான வழிகாட்டுதல் இல்லை. அதை இந்த திட்டம் செய்யும்' எனத் தெரிவித்தார்.
இதையும் படிங்க: விஜய் சேதுபதிக்கு எதிரான வழக்கு ரத்து: உயர் நீதிமன்றம் அதிரடி
