இளைஞர்களைப் பக்கவாதத்திற்கு அழைத்துச் செல்லும் மன அழுத்தம்!

சென்னை: கரோனா பரவல் தடுப்பு நடவடிக்கையாக அமல்படுத்தப்பட்ட பொது முடக்கத்தினால் கூடுதல் மன அழுத்தம் ஏற்பட்டு, இளைஞர்களுக்கு அதிகளவில் பக்கவாதம் ஏற்பட்டுள்ளதாக கூறப்படுகிறது.

கரோனா பெருந்தொற்றுநோய்க் காலத்தின்போது சென்னையில் பக்கவாத நோயாளிகளின் எண்ணிக்கை அதிகரித்துள்ளது. இந்நிலையில் சென்னை பழைய மகாபலிபுரம் சாலையில் உள்ள அப்போலோ மருத்துவமனை, 20 வயது முதல் 80 வயதுக்குள்பட்ட 250-க்கும் மேற்பட்ட பக்கவாத நோயாளிகளுக்குச் சிறந்த சிகிச்சை வழங்கி மறு வாழ்வு அளித்துள்ளது.

கரோனா பரவல் தடுப்பு நடவடிக்கையாக அமல்படுத்தப்பட்ட பொது முடக்கத்தினால் கூடுதல் மன அழுத்தம் ஏற்பட்டு, இளைஞர்களிடையே அதிகளவில் பக்கவாதம் ஏற்பட்டதற்கு ஒரு காரணமாக கூறப்படுகிறது. கரோனா காலத்தில் மாதத்திற்கு சராசரியாக சுமார் 25 நோயாளிகள் பக்கவாதத்தால் பாதிக்கப்பட்டு ஒஎம்ஆரில் உள்ள அப்போலோ சிறப்பு மருத்துவமனைகளில் அனுமதிக்கப்பட்டனர். அவர்களில் 40 விழுக்காட்டினர் 20 முதல் 40 வயதுக்கு உட்பட்டவர்கள்.

பொதுவாக பக்கவாதம் என குறிப்பிடப்படும் ஒரு உறைவு அல்லது த்ரோம்பஸ் காரணமாக மூளையின் ஒரு பகுதிக்கு ரத்தம் பாய்வதை நிற்கும்போது பெரும்பான்மையான பக்கவாதம் ஏற்படுகிறது. ரத்த ஓட்டத்தில் ஏற்படும் இந்த குறுக்கீடு, சுற்றியுள்ள மூளை செல்கள் சேதம் அடைவதற்கு வழிவகுக்கிறது.

24 வயது பெண் சென்னை ஓஎம்ஆரில் உள்ள அப்போலோ மருத்துவமனைக்கு மயக்க நிலையில் கொண்டு வரப்பட்டார். அவருக்கு இருதரப்பு முதுகெலும்பு தமனி சிதைவு இருப்பதை மருத்துவர்கள் கண்டறிந்தனர். முதுகெலும்பு தமனி பிளவுபடுத்தலுக்காக மெக்கானிக்கல் த்ரோம்பெக்டோமி செய்யப்பட்டிருப்பது நம் நாட்டில் இதுவே முதல் முறையாகும்.

உலகளவில் இதுபோன்ற பாதிப்புகள் ஏற்பட்டவர்களில் மிகக் குறைவான நோயாளிகள் மட்டுமே உயிர் பிழைத்துள்ளனர். வாழ்நாள் முழுவதுமான ஊனத்தில் இருந்து ஒரு பக்கவாதம் நோயாளியை காப்பாற்றுவதில் நேரம் மிக முக்கியமான காரணியாக உள்ளது.

இது குறித்து டாக்டர் கார்த்திகேயன் கூறும்போது, “மன அழுத்தம், வாழ்க்கை முறை மாற்றங்கள் மற்றும் ஆரோக்கியம் அற்ற உணவுப் பழக்கவழக்கங்கள் மூளை நோய்களுக்கு முக்கிய காரணமாக அமைகின்றன. இளைஞர்கள் 12 முதல் 14 மணிநேரங்களுக்கு மேல் வேலை செய்யும் நிலை உள்ளது. மேலும் இரவுப் பணி மற்றும் முறையற்ற தூக்கத்தை ஏற்படுத்தக் கூடிய மாறுபட்ட பணி நேரங்கள் உட்பட பல சிக்கலான வாழ்க்கை முறையைப் பின்பற்றுகின்றனர்.

குறிப்பாக வேலை செய்யக் கூடிய பெண்கள், வீடு மற்றும் அலுவலகப் பணிகள் என இரண்டையும் நிர்வகிக்க வேண்டிய சிக்கல் அதிகரித்ததன் காரணமாக அவர்களின் மன அழுத்தம் மிகவும் அதிகரித்துள்ளது.

இளைஞர்கள் மத்தியில் பக்கவாதம் ஏற்படுவதற்கு மரபணு காரணிகள், உறைதல் கோளாறு, வாஸ்குலிடிஸ் மற்றும் துண்டிக்கப்படுதல் ஆகியவையும் முக்கியக் காரணங்களாக இருக்கலாம். இளம் நோயாளிகளுக்கு பக்கவாதம் ஏற்படுத்தும் முக்கிய ஆபத்து என்னவென்றால், அவர்களின் மூளை வேகமாக வீங்கும். பக்கவாத அறிகுறிகள் ஏற்பட்ட 4 மணிநேரத்திற்குள் மருத்துவமனைக்குச் சென்று சிகிச்சை பெற வேண்டும்”என்றார்.