வேலூர் மாவட்டம் நாராயணபுரத்தைச் சேர்ந்த குப்பன் என்பவர் விபத்து ஒன்றில் பலியானார். இவர் ஆதிதிராவிட வகுப்பைச் சேர்ந்தவர் என்பதால் மயானத்திற்கான பாதை மறுக்கப்பட்டதாகக் கூறப்படுகிறது. இதனால் அவரது உறவினர்கள் குப்பனின் உடலை மேம்பாலத்தில் இருந்து கீழே இறக்கி மயானத்திற்கு கொண்டு சென்றனர்.
இந்த சம்பவம் தொடர்பாக அரசு வழக்கறிஞர் கார்த்திகேயன் சென்னை உயர் நீதிமன்றத்தில் முறையிட்டார். அதன்படி, சென்னை உயர் நீதிமன்றம் தாமாக முன் வந்து வழக்கை விசாரணைக்கு எடுத்தது. இந்நிலையில், இந்த வழக்கு இன்று மீண்டும் நீதிபதிகள் மணிக்குமார், சுப்பிரமணிய பிரசாத் அமர்வு முன்பு விசாரணைக்கு வந்தது.
அப்போது, சம்பவம் நடந்த நாராயணபுரம் கிராமத்தில் இருக்கும் ஆதிதிராவிடர்களுக்கு தனி மயானம் அமைத்துள்ளதாக தாசில்தார் தரப்பில் பதில் மனு தாக்கல் செய்யப்பட்டது. இதற்கு அதிருப்தி தெரிவித்த நீதிபதிகள், தமிழ்நாட்டில் ஆதி திராவிடர்களுக்கென தனி மருத்துவமனைகளோ, அரசு அலுவலகங்களோ, காவல் நிலையங்களோ இல்லாத நிலையில், அவர்களுக்கு தனி மயானத்தை அரசே அமைத்து கொடுப்பது சாதி பிரிவினையை ஊக்குவிப்பது போல் உள்ளதாகத் தெரிவித்தனர்.
மேலும், தெருக்களில் இருந்த சாதி பெயர்களை நீக்க வேண்டும் என அரசாணை பிறப்பிக்கப்பட்டுள்ள நிலையில், பள்ளிகளில் உள்ள 'ஆதிதிராவிடர் நலப்பள்ளி' போன்ற பெயர்களை நீக்காதது ஏன்? என கேள்வி எழுப்பினர்.
இதைத் தொடர்ந்து குப்பன் உடலை பாலத்தில் இருந்து கயிறு கட்டி இறக்கிய சம்பவம் தொடர்பாக எடுக்கப்பட்ட நடவடிக்கை குறித்து 28ஆம் தேதி அறிக்கை தாக்கல் செய்ய மாவட்ட ஆட்சியர் மற்றும் தாசில்தாருக்கு நீதிபதிகள் உத்தரவிட்டு வழக்கு விசாரணையை ஒத்தி வைத்தனர்.
