சென்னை: சென்னையில் பொதுமக்களை ஏமாற்றி ரூ.4 கோடி மோசடி செய்த நபரை போலீசார் கைது செய்துள்ளனர். வேளச்சேரியில் இயங்கி வரும் டெக்டில்ட் இன்போ சொலியூஷன்ஸ் என்ற நிறுவனத்தின் இயக்குநர் லட்சுமி நாராயணன்(37). இவர் எஸ்.எல்.என் எண்டர்பிரைசஸ், ஸ்ரீ சாய் பாலாஜி என்ற டிரேடிங் கம்பெனிகளை நடத்தி வந்துள்ளார். இவர் தனது டிரேடிங் கம்பெனிகளில் முதலீடு செய்தால் 1.5 சதவீதம் லாபத்தொகை தருவதாக மக்களிடம் ஆசை வார்த்தைகள் கூறி நம்பவைத்துள்ளார்.
பின் அவர்களிடமிருந்து ஆவணங்களைப் பெற்று அதன் மூலம் அப்ளிகேஷன் படிவத்தில் அவர்களுடைய கையெழுத்துக்களை போலியாக பதிவிட்டு அந்த ஆவணங்களை பல்வேறு வங்கிகள் மற்றும் தனியார் நிதி நிறுவனங்களிலும் கொடுத்து ரூ.1.8 கோடி வரை மோசடியாக கடன் பெற்றுள்ளார்.
இதையடுத்து அவருடைய நிறுவனங்களின் வங்கி கணக்குகளின் மூலம் பணத்தைப் பெற்றுகொண்டு பின்பு சொன்னபடி வங்கிகளில் ஈ.எம்.ஐ கட்டாமலும், எந்தவித பணமும் கொடுக்காமலும் ஏமாற்றி வந்துள்ளார். இந்நிலையில் சென்னையை சேர்ந்த அஸ்வின் குமார் மற்றும் அவரது மனைவி ஆகியோர் சென்னை மத்திய குற்றப்பிரிவு போலீசாரிடம் இது குறித்து புகார் அளித்தனர். அப்புகாரின் பேரில், வழக்குப்பதிவு செய்த சென்னை மத்திய குற்றப்பிரிவு போலீசார் தலைமறைவாக இருந்த லட்சுமி நாராயணனை வலைவீசித் தேடிவந்தனர். இதனிடையே, அவரை மத்திய குற்றப்பிரிவு போலீசார் இன்று (ஜூலை 13) கைது செய்தனர்.
இதையும் படிங்க: முன்னாள் டிஜிபி பெயரில் போலி முகநூல் கணக்கு தொடக்கம்:மர்ம நபர்கள் அட்டூழியம்!
பின்னர் அவரிடம் போலீசார் நடத்திய விசாரணையில், வாடிக்கையாளர்களுக்கு தனது நிறுவனத்தில் பணம் முதலீடு செய்தால் அதிக லாபம் தருவதாக ஆசை வார்த்தைகள் கூறியதாகவும், வீட்டு கடன் மற்றும் தொழில் கடன் உள்ளிட்டவைகள் பெற்று தருவதாகவும் மோசடி செய்தது தெரியவந்தது. அவ்வாறு பலரிடமும் பெற்ற பான் கார்டு, ஆதார் கார்டு உள்ளிட்டவைகளைக் கொண்டு அவர்களின் கையொப்பத்தை வங்கி லோன் படிவத்தில் சட்டவிரோதமாக பதிவிட்டு ஆவணங்களை தயாரித்து வங்கிகளில் சமர்ப்பித்து கடனாக பணம் பெற்றது கண்டுபிடிக்கப்பட்டது.
பல தனியார் வங்கிகளிலும், தனியார் நிதி நிறுவனங்களிலும் இவ்வாறு முறைகேடாக பெற்ற பணத்தை சம்பந்தப்பட்டவர்களின் வங்கி கணக்கிலிருந்து தனது வங்கி கணக்கிற்கு மாற்றியதும் தெரியவந்தது. இவை தவிர, நீட் தேர்வு எழுதிய மாணவர்கள் உள்ளிட்ட பலரையும் மருத்துவக் கல்லூரிகள், தொழிற்பயிற்சி கல்லூரிகள், நர்சிங் கல்லூரிகள், கலை மற்றும் அறிவியல் கல்லூரிகளில் இடம் பெற்று தருவதாக ஏமாற்றி சுமார் ரூ.4 கோடி வரை மோசடி செய்ததும் அம்பலமாகியுள்ளது.
இதையும் படிங்க: யூடியூப் பார்த்து 1 லட்சம் மதிப்புள்ள போலி ரூபாய் நோட்டுகள் தயாரித்த இளைஞர்கள் கைது!
