சென்னை: தமிழ்நாட்டில் எம்பிபிஎஸ் படிப்பில் 37 அரசு மருத்துவக்கல்லூரிகளில் அரசு ஒதுக்கீட்டில் 4 ஆயிரத்து 308 இடங்களும், 18 சுயநிதி மருத்துவக்கல்லூரிகளில் அரசு ஒதுக்கீட்டில் 1,483 இடங்களும், நிர்வாக ஒதுக்கீட்டில் 1,166 இடங்களும் உள்ளன.
மேலும் இரண்டு அரசு பல்மருத்துவக்கல்லூரிகளில் அரசு ஒதுக்கீட்டில் 165 இடங்களும், 18 சுயநிதி பல்மருத்துவக்கல்லூரிகளில் அரசு ஒதுக்கீட்டில் 1,125 இடங்களும், நிர்வாக ஒதுக்கீட்டில் 635 இடங்களும் உள்ளன. நடப்பாண்டில் மொத்தம் உள்ள 6 ஆயிரத்து 957 எம்பிபிஎஸ் இடங்கள், 1, 925 பிடிஎஸ் இடங்களுக்கு இன்று(டிச.19) முதல் ஆன்லைனில் விண்ணப்பிக்கலாம் எனத் தெரிவிக்கப்பட்டுள்ளது.
ஆன்லைன் விண்ணப்பம்
இந்தப் படிப்புகளில் சேர்வதற்கு 10,12ஆம் வகுப்பு முடித்து, நீட் தேர்வில் தேர்ச்சி பெற்ற தகுதியான மாணவர்கள் இன்று காலை 10 மணி முதல் ஜனவரி 7ஆம்தேதி மாலை 5 மணி வரையில் https://tnmedicalselection.net/ மற்றும் https://ugreg.tnmedicalonline.co.in/ என்ற இணையதளத்தில் ஆன்லைன் மூலம் விண்ணப்பிக்கலாம். விண்ணப்ப கட்டணமாக ரூ.500 செலுத்த வேண்டும்.
அரசு ஒதுக்கீடு இடங்களுக்கு தனியாகவும், சுயநிதி மருத்துவக்கல்லூரியில் உள்ள நிர்வாக ஒதுக்கீடு இடங்களுக்கு தனியாகவும் விண்ணப்பிக்க வேண்டும்.
அரசுப் பள்ளியில் படித்த மாணவர்கள் தாங்கள் படித்தப் பள்ளியின் தலைமை ஆசிரியர்களிடம் 6ஆம் வகுப்பு முதல் 12ஆம் வகுப்பு வரையில் படித்ததற்கான சான்றிதழ்களை பெற்று வைக்க வேண்டும் என தெரிவிக்கப்பட்டுள்ளது.
மாணவர்கள் தங்களுக்கு ஏற்படும் சந்தேகங்களை 044 28364822, 9884224648, 9884224649, 9884224745,9884224746 ஆகிய எண்களில் தொடர்பு கொண்டு கேட்டுக் கொள்ளலாம். மேலும் 37 அரசு மருத்துவக்கல்லூரிகள், இரண்டு அரசு பல் மருத்துவக்கல்லூரிகள், மற்றும் பெரம்பலூர் மாவட்டத்தில் உள்ள அரசு பாலிடெக்னிக் கல்லூரியில் மாணவர்களுக்கான உதவி வழிகாட்டு மையம் அமைக்கப்பட்டுள்ளது. மாணவர்கள் இங்கு சென்றும் விண்ணப்பங்களை பூர்த்தி செய்து கொள்ளலாம் எனவும் அறிவிக்கப்பட்டுள்ளது.
இதையும் படிங்க: நெல்லையில் பள்ளியில் அலுவலர்கள் நேரில் ஆய்வு
