சென்னை: அம்பேத்கரின் 66ஆவது நினைவு தினத்தை முன்னிட்டு சென்னை ராஜா அண்ணாமலைபுரத்தில் உள்ள அம்பேத்கர் மணி மண்டபத்தில் தெலங்கானா ஆளுநரும், புதுச்சேரி துணை நிலை ஆளுநருமான தமிழிசை சௌந்தரராஜன் மரியாதை செலுத்திய பின் செய்தியாளர்களைச் சந்தித்தார்.
அப்போது பேசிய அவர், "அரசியலமைப்பின் தந்தை, சட்ட மேதை, அவரது நினைவு நாளை போற்றுவதில், மரியாதை செலுத்துவதில் பெருமை கொள்கிறேன். நேற்று புதுவையில் அம்பேத்கர் அவர்களும் மோடி அவர்களும் என்றும் புத்தகம் வெளியிடப்பட்டது. அதற்கு இளையராஜா முன்னுரை எழுதியிருந்தார். அம்பேத்கர் என்னவெல்லாம் கனவு கண்டாரோ அது இந்தியாவில் நிறைவேற்றப்பட்டுள்ளது. நாடாளுமன்றத்தில் அம்பேத்கர் ஆற்றிய சட்டப் புத்தகம் தான் எனது புனித நூல் என்று பிரதமர் அறிவித்தார்.
ஜி20 மாநாட்டிற்கு நாம் தலைமை தாங்குகிறோம். நம் நாடு எப்படி இருக்க வேண்டும் என்று அம்பேத்கர் கனவு கண்டாரோ அந்த வழியில் நமது நாடு பயணித்துக்கொண்டிருக்கிறது. அந்த பலன் தான் ஜி20 மாநாட்டிற்கு நாம் தலைமை தாங்குகிறோம். அந்த வகையில் நாம் அவருக்கு பெருமை சேர்த்துக்கொண்டிருக்கிறோம். ஜி20 மாநாடு குறித்து வரும் ஒன்பதாம் தேதி பிரதமர் மோடி, ஆளுநர், துணை நிலை ஆளுநர் மற்றும் முதலமைச்சர்களுடன் ஒரு ஆலோசனைக்கூட்டம் நடத்தவுள்ளார்.
ஜி20 மாநாட்டின் பெருமை குறித்து கட்டுரைப் போட்டிகள், பேச்சுப் போட்டிகள், தெலங்கானா மற்றும் புதுவையில் நடத்த இருக்கிறோம். ஜி20 மாநாட்டிற்குத் தலைமை தாங்குகிறோம் என்பது பெருமைக்குரிய விஷயம். மிகப்பெரிய பெருமையை இந்தியா பெற்றுள்ளது. சீனா கரோனா தொற்றில் மீண்டும் பாதிப்பு ஏற்பட்டு ஊரடங்கினை செய்து கொண்டிருக்கிறது. ஆனால், முன்னெச்சரிக்கை நடவடிக்கையாக இந்தியாவில் முன்னதாகவே ஊரடங்கு நடத்தியதாலும் தேவையான தடுப்பூசிகளை போட்டதாலும் கரோனாவை தடுத்துள்ளோம். எல்லாவிதத்திலும் உலகிற்கு வழிகட்டும் நிலையை இந்தியா அடைந்திருக்கிறது.
ஆளுநர் பதவி என்பது ஒரு முதல் குடிமகனுக்கான பதவி, அவர்களுக்கு கொடுக்க வேண்டிய மரியாதையை கொடுக்கத் தான் வேண்டும். எந்தப் பிரச்னையாக இருந்தாலும் பேசி தீர்த்துக்கொள்ள வேண்டும், முழுமையாக ஆளுநரைத் திரும்ப பெற வேண்டும் என்று வழக்குத் தொடர்வது சரியல்ல. இது என்னுடைய கருத்து" எனக் கூறினார்.
இதையும் படிங்க: ஆந்திர பிரதேச ஆளும்கட்சி எம்எல்ஏ வீட்டில் ஐடி ரெய்டு
