சென்னை: தமிழ்நாட்டில் தேர்தல் நடைபெறுவதாக அறிவிக்கப்பட்டதைத் தொடர்ந்து, கடந்த ஜனவரி 20ஆம் தேதி இறுதி வாக்காளர் பட்டியல் வெளியிடப்பட்டது. அதன்படி, வாக்காளர்களின் எண்ணிக்கை 6 கோடியே 26 லட்சத்து 74 ஆயிரத்து 446 பேர் இருந்தனர்.
அதன் பின்னர் தகுதி உடைய வாக்காளர்களை சேர்ப்பதற்கான முகாம் நடைபெற்றது. அதன்படி, ஜனவரி 20ஆம் தேதி முதல் மார்ச் 19ஆம் தேதி வரை 2 லட்சத்து 85 ஆயிரத்து 391 பேர் வாக்காளர் பட்டியலில் இணைந்துள்ளனர்.
தற்போது தமிழ்நாடு முழுவதும், மொத்த வாக்காளர்களின் எண்ணிக்கையில் ஆண்கள் - 3 கோடியே 9 லட்சத்து 23 ஆயிரத்து 651 பேரும் பெண்கள் 3 கோடியே 19 லட்சத்து 39ஆயிரத்து 112 பேர் உள்ளனர். மூன்றாம் பாலினத்தவர் 7,192 பேர் உள்ளனர். ஆண் வாக்காளர்களைவிட பெண் வாக்காளர்கள் 10 லட்சம் பேர் அதிகமாக உள்ளனர்.
அதிக அளவு வாக்காளர்கள் கொண்ட தொகுதியாக சோழிங்கநல்லூர் உள்ளது. இங்கு 6 லட்சத்து 98 ஆயிரத்து 820 பேர் வாக்காளர்கள் உள்ளனர். அதேபோல், குறைந்தபட்ச வாக்காளர்கள் கொண்ட தொகுதியாக துறைமுகம் உள்ளது. இங்கு 1 லட்சத்து 75 ஆயிரத்து 770 பேர் வாக்காளர்களாக உள்ளனர்.
மாவட்ட வாரியாக அதிக வாக்காளர்கள் உடைய மாவட்டமாக சென்னை மாவட்டம் உள்ளது. அங்கு 40 லட்சத்து 57 ஆயிரத்து 61 பேர் உள்ளனர். குறைந்த அளவாக அரியலூர் மாவட்டத்தில் 5 லட்சத்து 30ஆயிரத்து 983 பேர் உள்ளனர்.
